Viðskipti | mbl | 8.10.2014 | 15:34

Staða Rannveigar rædd í næstu viku

Rannveig Rist. Ómar Óskarsson

Farið verður yfir stöðu Rannveigar Ristar, stjórnarmanns HB Granda, í næstu viku að sögn Kristjáns Loftssonar, stjórnarformanns félagsins.

Í tilkynningu Kauphallarinnar segir að Rannveig hafi tilkynnt félaginu að gefin hafi verið út ákæra á hendur henni vegna atvika sem áttu sér stað á meðan hún sat í stjórn SPRON árið 2008. Þá segir í tilkynningunni að félagið hafi ekki frekari upplýsingar að svo stöddu en muni fara yfir málið á næstu dögum.

Kristján benti á að málið hefði verið komið í fjölmiðla áður en stjórnin hefði séð nokkur gögn þar um og sagði að tilkynning yrði send út þegar búið væri að fara yfir málið.

Samkvæmt hlutafélagalögum þyrfti Rannveig að víkja úr stjórn HB Granda verði hún sakfelld í málinu.

Fyrsta sinn sem stjórn er ákærð

Sérstakur saksóknari hefur ákært fyrrverandi sparisjóðsstjóra og fjóra fyrrverandi stjórnarmenn SPRON fyrir umboðssvik og er Rannveig Rist er á meðal ákærðra stjórnarmanna. Er þetta í fyrsta sinn sem sérstakur saksóknari ákærir stjórn fjármálafyrirtækis vegna ákvarðana í aðdraganda fjármálahrunsins. Málið varðar tveggja milljarða króna lánveitingu sparisjóðsins til Exista þann 30. september 2008 með gjalddaga þann 31. október sama ár. Í rannsóknarskýrslu Alþingis segir að beiðni um lánveitinguna hefði verið lögð fram á stjórnarfundi sparisjóðsins 30. september 2008. Þá var bókað að Erlendur Hjaltason, stjórnarformaður félagsins hefði vikið af fundi áður en lánið var tekið til umfjöllunar. Ekki kom til uppgjörs á láninu í lok október 2008, heldur var það framlengt og hinn 30. október 2008 var tilkynnt um afskráningu Exista hf. úr Kauphöll Íslands.

Frétt mbl.is: Rannveig Rist áfram forstjóri