Viðskipti | AFP | 10.11.2014 | 11:06

Eitt smjörstykki á mann

Japanskur almenningur hefur áhyggjur af jólabakstrinum. Hilmar Bragi/Víkurfréttir

Alvarlegur smjörskortur ríður nú yfir japanskan markað og eru margir smásalar farnir að takmarka smjörkaup almennings við eitt stykki á mann. Víða má sjá merkispjöld í gluggum með áletruninni „Við eigum smjör!“ til þess að lokka viðskiptavini inn í verslanir.

Margir hafa lýst yfir áhyggjum vegna ástandsins þar sem jólahátíðin nálgast óðfluga með tilheyrandi jólabakstri. Talsmaður landbúnaðarráðuneytisins segir að skortinn megi rekja til þess að óvanalega heitt hafi verið í sumar og voru kýrnar úrvinda í hitanum og mjólkuðu því minna en vanalega. Þá hafa kúabændur sett það í forgang að viðhalda mjólkinni í búðunum og hefur því minna verið til af smjöri.

Stjórnvöld gripu til aðgerða vegna skortsins í maí og fluttu inn um sjö þúsund tonn af smjöri auk þrjú þúsund tonna til viðbótar í september en þetta er í fyrsta skipti í fleiri ár sem nauðsynlegt hefur verið í Japan að kaupa svo mikið magn af innfluttum mjólkurvörum.

Að sögn talsmanns landbúnaðarráðuneytisins er um 30 prósent minna af mjólkurvörum í umferð nú en á sama tíma í fyrra.