Óttast að nýtt hrun nálgist óðfluga

Forsætisráðherra Bretlands, David Cameron, varar við því að öll viðvörunarljós séu farin að blikka og hætta sé á öðru efnahagshruni.

Segir Cameron að öll viðvörunarljósin séu farin að blikka í mæalborði efnahagsmála heimsins og líkir hann ástandinu nú við það sem gerðist fyrir hrunið fyrir sex árum. Þetta kemur fram í grein sem Cameron ritar í Guardian í dag við lok G20-ráðstefnunnar í Brisbane í Ástralíu. 

Hann segir að óstöðugleiki og óöryggi einkenni efnahag heimsins núna og að bresku hagkerfi stafi raunveruleg hætta af þessu. Bendir hann á að samdrátturinn á evrusvæðinu sé þegar farinn að hafa áhrif á útflutning frá Bretlandi og framleiðslu.

Í síðustu viku sagði seðlabankastjóri Englands, Mark Carney, að hætta væri á stöðnun víða í Evrópu og svipað kom fram í máli forstjóra Alþjóðagjaldeyrissjóðsins, Christine Lagarde, á fundinum í Brisbane þar sem leiðtogar 20 helstu iðnríkja heims komu saman. Sagði hún að jafnvel mætti búast við því að atvinnuleysi og lítill hagvöxtur yrði hefðbundið ástand í Evrópu. 

• 4 blogg um fréttina

Bloggað um fréttina

• Geir Ágústsson: Næsta hrun verður verra
• Baldvin Björgvinsson: Áramótaheit Dögunar - Samþykkt landsfundar 8. nóvember 2014
• Ómar Ragnarsson: Vandamál fíkilsins.
• Heimssýn: Cameron óttast nýtt hrun í Evrópu