Fæla fjármagn frá Danmörku með vaxtalækkun

Danski seðlabankinn lækkaði innlánsvexti um 0,15 prósent í dag og eru þeir nú neikvæðir um 0,2 prósentur. Er þetta tilraun til þess að standa vörð um fastgengisstefnu seðlabankans og fæla fjármagn frá landinu en töluverður þrýsingur hefur verið á dönsku krónuna. 

Í síðustu viku hætti Sviss inngripum í gengi svissneska frankans en frá árinu 2011 hefur verið þak á gengi gjaldmiðilsins gagnvart evrunni. Höfðu fjármagnseigendur í Evrópu því leitað skjóls í frankanum og ýtt gengi gjaldmiðilsins hátt upp. Til að halda genginu niðri þurfti seðlabanki Sviss að kaupa að jafnaði tvo milljarða evra hvern einasta dag.

Sambærilegt þak er á dönsku krónunni gagnvart evrunni og voru fjárfestir teknir að færa sig yfir til Danmerkur. Hafa því einhverjir velt því fyrir sér hvort danska krónan sé næst í röðinni. 

Enginn fundur var á dagskrá hjá seðlabankanum í dag og kom ákvörðunin því nokkuð á óvart, 

Í vikulok evran hafði veikst um 21% gagnvart frankanum og bandaríkjadalur veikst um 15,4% gagnvart svissneska gjaldmiðlinum.

• 1 blogg um fréttina

Bloggað um fréttina

• G. Tómas Gunnarsson: Telst það ekki skrýtin "búmennska" að "fæla frá sér fé"?