Staða heimila aldrei betri frá bankahruni

Hagvísar benda til þess að hagur heimila hafi vænkast umtalsvert á liðnu ári og sé nú í ársbyrjun betri en nokkru sinni síðan fyrir hrun bankakerfisins, að því er fram kemur í Morgunkorni Íslandsbanka.

Þessu til stuðnings bendir greiningardeild bankans meðal annars á þróun kaupmáttar, íbúðaverðs og atvinnustigs á síðastliðnu ári, að því er fram kemur í Morgunblaðinu í dag.

Laun hækkuðu um 5,8% milli 2013 og 2014 samkvæmt launavísitölu, sem er viðlíka hækkun og 2012 en minni hækkun en árin tvö þar á undan. Hins vegar stuðlaði lág verðbólga að því að kaupmáttur jókst verulega, eða um 3,7%. Þetta er mesta kaupmáttaraukning frá árinu 1998, að árinu 2007 undanskildu þegar kaupmáttur jókst um 3,8%. Kaupmáttur hefur nú aukist um 15,6% frá því sem hann var minnstur eftir hrunið og er orðinn svipaður og þegar hann var mestur á þensluskeiðinu fyrir 2008, að sögn Greiningar Íslandsbanka.