Semja um búnað fyrir 1,2 milljarða

HB Grandi hefur samið við Skagann á Akranesi og 3X Technologies á Ísafirði um að setja upp nýjan vinnslu- og lestarbúnað í Engey RE, Akurey AK og Viðey RE, nýja ísfisktogara sem HB Grandi fær afhenta á árunum 2016 og 2017. Samningarnir hljóða samtals upp á um 1.190 milljónir króna og mun vinna við uppsetninguna fara fram á Akranesi.

Þetta kemur fram í tilkynningu HB Granda til Kauphallarinnar.

Um er að ræða tvo samninga, annars vegar um búnað á vinnsludekki og hins vegar um sjálfvirkt flutningakerfi kara. Með sjálfvirka flutningakerfinu þarf ekki lengur að vinna við að setja fisk í kör og ísa hann í lest togaranna.

Lest skipanna verður því mannlaus. Flutningskerfið mun bæta vinnuaðstöðu sjómanna verulega, tryggja aukin gæði og lækka rekstrarkostnað. Búnaðurinn á vinnsludekki mun einnig bæta vinnuaðstöðu og tryggja betri meðhöndlun fisks, lifrar, hrogna og slógs, afkastamikla blóðgun og slægingu og betri kælingu.

• Blogga um frétt