Landsframleiðslan aldrei meiri

Alls nam verg landsframleiðsla á síðasta ári 1.993 milljörðum króna og hefur hún aldrei verið meiri. Hagkerfið hefur endurheimt sig eftir fallið sem varð í landsframleiðslunni á árunum 2008 til 2010 og er landsframleiðslan nú 0,6% að meiri að raunvirði en á árinu 2008. Samkvæmt bráðabirgðatölum Hagstofunnar var hagvöxturinn á árinu 1,9%

Þetta kemur fram í Hagsjá Landsbankans þar sem jafnframt er bent á að töluverður vöxtur þjóðarútgjalda hafi mælst á síðasta ári en þau eru samtala einkaneyslu, samneyslu og fjárfestingar. Vöxturinn milli ára nam 5,3% og er það talið gefa til kynna að hagkerfið sé á verulegu skriði um þessar mundir. 

Hagvöxturinn var þó undir væntingum allra þeirra sem gefa út þjóðhagsspár en opinberar spár liggja á bilinu 2,0% til 3,1%. Að meðaltali gerðu spár ráð fyrir um 2,8% vexti. Hluti spáskekkjunnar felst í vanmati á vexti innflutnings og að vöxtur hans hafi ekki skilað sér með samsvarandi hætti í aukningu einkaneyslu og fjárfestingar í tölum Hagstofunnar.

Einkaneyslan ekki náð sömu gildum

Ólíkt landsframleiðslunni í heild hefur einkaneyslan ekki náð aftur þeim gildum sem hún var í fyrir fall viðskiptabankanna þrátt fyrir kröftugan vöxt á seinasta ári. Árið 2014 var einkaneyslan 1.048 milljarðar sem er 8,7% minna að raunvirði en árið 2007 og 2,3% minna en árið 2006.

Þessi munur skýrist að einhverju leyti af því að á árunum fyrir 2008 voru heimilin að auka skuldir sínar og sú skuldsetning kom að einhverju leyti fram í einkaneyslu, en á síðustu árum hafa heimilin verið að minnka skuldir sínar

Einkaneysla hefur ekki náð því sem hún var árið 2007 Sigurður Bogi Sævarsson

• 1 blogg um fréttina

Bloggað um fréttina

• Ómar Ragnarsson: Nú er maður hættur að jafna sig. Maður "endurheimtir sig".