Skífunni lokað eftir 40 ár

Verslunum Skífunnar í Kringlunni og Smáralind var lokað í síðasta skipti í gær og er sögu fjörtíu ára fyrirtækis þar með lokið. 

Guðmundur Magnason, eigandi Magna verslana ehf. sem á og rekur Skífuna, Gamestöðina og Heimkaup.is, segir reksturinn einfaldlega ekki hafa gengið upp. Skífan hafi verið komin í of litlar verslanir. Tölvuleikirnir hafi verið farnir að ýta tónlistinni og kvikmyndunum til hliðar og að ekki hafi verið hægt að bjóða upp á nauðsynlegt vöruúrval í svo litlu rými. Hann segir að Íslendingar séu vissulega farnir að sækja tónlist í meira mæli á netið en telur þó tíma geisladiskanna og geisladiskaverslana ekki að fullu liðinn.

Skífunni á Laugarvegi var lokað á árinu 2010 en fyrrverandi fjármálastjóri Skífunnar sagði í samtali við Morgunblaðið á þeim tíma að húsnæðið væri of stórt og salan of lítil til þess að reksturinn stæði undir leigunni. Gekk reksturinn í verslunarmiðstöðvunum þá betur.

Skífan var stofnuð árið 1975 og er fjörtíu ára sögu fyrirtækisins þar með lokið.

• 1 blogg um fréttina

Bloggað um fréttina

• Ómar Ragnarsson: Tímanna tákn.