Viðskipti | mbl | 21.3.2015 | 16:05

Horfa eigi til aðgerða sem skili árangri

Margrét Sanders, formaður SVÞ mbl.is/Þórður Arnar Þórðarson

Margrét Sanders, formaður SVÞ, segir að miðað kröfugerð stéttarfélaganna nú reiknist SVÞ til að það svari til 30-70% launahækkunar. Hún telur að frekar eigi að horfa til aðgerða sem skili árangri. Þetta er meðal þess sem kom fram í máli Margrétar á aðalfundi SVÞ í vikunni.

„Mikil óvissa er í kjaraviðræðum þessa stundina. Kaupmáttaraukning innan ársins 2014 var 5,8%, -algerlega frábær árangur og þið getið séð hann hér í sögulegu samhengi. Kröfur þeirra sambanda sem ganga hvað harðast fram og hafa núna boðað verkfallsaðgerðir eru að lágmarkslaun verði 300 þúsund og segjast vera að leggja megináherslu á lágmarkslaunin. En er það raunverulega þannig?

Þeir eru allavega einnig með í sinni kröfugerð að lagfæra þarf launatöflu vegna mikilla krónutöluhækkana undanfarin ár og gera kröfu um að bilið á milli launaflokka verði 1,5%. Okkur reiknast til að lægstu laun séu þá að hækka um 50% og hæstu flokkarnir um 70%. Fleiri félög hafa fylgst í kjölfarið en örlítið hófsamari ef hægt er að tala um hófsemd í þessu samhengi, þar eru kröfur um 15 – 30 % hækkanir.

Eru 30/50/70 % launakröfur að skila einhverju til launþega. Við segjum nei.

Horfum til þess hvað getur skilað árangri, og þá sérstaklega til lægstu og millitekjuhópanna.

Skoðum hækkun persónuafsláttar, skoðum tekjuskattsbirgði þeirra landa sem við berum okkur saman við. Persónuafsláttur var 15.455 á mánuði þegar staðgreiðslukerfið var tekið upp árið 1988. Persónuafsláttur 2015 er 50.902,- Hann hefur hækkað um 230% á meðan laun hafa hækkað yfir 400%
Lagfærum launakerfið þannig að grunnlaun hækka og hlutfall yfirvinnu, álags og fastra bónusa lækka – sjá nánar á glæru
Förum í saumana á húsnæðismálunum, er leiga of há – er húsnæði of dýrt – eru kröfur í greiðslumati til þeirra sem eru að kaupa sér húsnæði eðlilegt?
Fellum niður tolla af fatnaði og skóm og/eða setjum þessar vörur í lægra vsk þrep – við sjáum í okkar skoðanakönnunum að því lægri sem launin eru þá kaupa menn hlutfallslega minna eða ekkert af fötum og skóm í útlöndum – hafa ekki möguleika á innflutningi á þessum vörum í ferðatöskum.
Leiðréttum og lækkum tolla af þeim landbúnaðarvörum sem eru með hvað hæstu tollana og nýtum þau tækifæri sem hafa myndast vegna meiri útflutnings landbúnaðarvara.

Þetta er það sem skiptir launþega máli auk eðlilegra launahækkana, þetta er það sem skilar okkur mesta kaupmættinum. Þetta er það sem gerir okkur samkeppnishæf við þjóðirnar sem við viljum bera okkur saman við,“ segir Margrét.