Stóraukin tedrykkja á Íslandi

Tedrykkja landsmanna virðist hafa stóraukist á liðnum árum á sama tíma og kaffidrykkja hefur bara haldið sínu striki. Frá árinu 2005 hefur innflutningur á tei aukist um 38 prósent á meðan innflutningur á kaffi hefur dregist saman um 2,4 prósent.

Samkvæmt tölum Hagstofunnar voru á árinu 2005 flutt 67,5 tonn af te til landsins en á árinu 2013 nam innflutningurinn 93,3 tonnum. Árið 2005 voru 2.503 tonn af kaffi og kaffilíki flutt inn, en á árinu 2013 hafði dregið lítillega úr, og nam innflutningurinn 2.441 tonni. Ekki hafa verið teknar saman tölur yfir innflutning á tei á síðasta ári en hins vegar dró ennþá frekar úr kaffiinnflutningi og stóð hann þá í 2.345 tonnum.

Svart te vinsælast

„Fólk er farið að læra að drekka te í staðinn fyrir kaffi,“ segir Kristín María Dýrfjörð, markaðsstjóri hjá Te og kaffi, en þegar blaðamaður náði af henni tali var hún einmitt nýkomin heim úr teferð í Þýskalandi, þar sem hún skoðaði og smakkaði te fyrir fyrirtækið. „Ég hef lengi verið talsmaður tedrykkju og hef alltaf verið að reyna að koma því á framfæri,“ segir Kristín og nefnir að Te og kaffi hafi t.a.m. stóraukið úrval sitt af tedrykkjum á liðnum árum.

Þrátt fyrir að um níutíu prósent sölunnar hjá Te og kaffi sé enn í formi kaffidrykkja segir Kristín að innkaup á tei hafi stóraukist hjá fyrirtækinu. Í fyrra fluttu þau inn 5,3 tonn en fjögur tonn á árinu 2013.

Kristín segir svart te vera vinsælast en að blandaðir tedrykkir njóti vaxandi hylli. Þá telur Kristín kaffimenningu yfir höfuð vera að taka breytingum á Íslandi og telur að fólk sé frekar farið að drekka betra kaffi og þá minna af því. „Í staðinn fyrir að vera að sulla í því allan daginn drekka margir tvo til þrjá góða bolla á dag,“ segir Kristín.

Bandaríkjamenn einnig á tevagninum

Íslendingar eru ekki einir um aukinn teáhuga því tes­ala hefur einnig aukist verulega í Banda­ríkj­un­um á síðustu árum. Heild­ar­sal­an nam um tveim­ur millj­örðum dollara á ár­inu 1990 en 10 millj­örðum á síðasta ári.

Á móti virðist draga úr kaffidrykkju en sam­kvæmt niður­stöðum könn­un­ar fé­lags kaffi­kaup­manna (e. Nati­onal Cof­fee Associati­on) drekka um 59 pró­sent Banda­ríkja­manna einn kaffi­bolla á hverj­um degi. Í fyrra var hlut­fallið 61 pró­sent en árið 2013 var það 63 pró­sent. Þróunin í átt að tedrykkju var þá sér­stak­lega talin greini­leg hjá þeim sem eru á aldr­in­um 16 til 26 ára.