Arðsemin fylgir ekki fjölguninni

Landsbankinn efnir til árlegrar vorráðstefnu um stöðu og framtíðarhorfur í ferðaþjónustu á Íslandi frá klukkan 08.30 til 10.15 dag en sýnt verður beint frá ráðstefnunni á vef Landsbankans.

Hagfræðideild Landsbankans gerir ráð fyrir að erlendum ferðamönnum muni fjölga verulega á næstu tveimur árum en vöxtur ferðaþjónustunnar á síðustu árum hefur verið umfram flestar aðrar atvinnugreinar hér á landi. Arðsemi fyrirtækja í greininni hefur hins vegar ekki fylgt þessari þróun sem skildi en hún er engu að síður ásættanleg í samanburði við aðrar atvinnugreinar, einkum á síðari árum.

Aðalfyrirlesari ráðstefnunnar, Bandaríkjamaðurinn Doug Lansky er eftirsóttur fyrirlesari um allan heim. Hann hefur m.a. ritað bækur fyrir ferðabókaröðina Lonely Planet, stýrt ferðaþáttum á sjónvarpsstöðinni Travel Channel, skrifað fyrir tímaritið National Geographic Traveler og haldið fyrirlestra á helstu ferðaráðstefnum heims.

Kynnir greiningu Hagfræðideildar

Á ráðstefnunni mun Gústaf Steingrímsson, hagfræðingur í Hagfræðideild Landsbankans, kynna nýja greiningu á stöðu og þjóðhagslegu mikilvægi ferðaþjónustunnar sem m.a. byggist á greiningu ársreikninga rúmlega 1.000 fyrirtækja í ferðaþjónustu.

Þá mun Elín Árnadóttir, aðstoðarforstjóri Isavia, segja frá fyrirhugaðri uppbyggingu og þróunaráætlun Keflavíkurflugvallar til næstu 25 ára.

Davíð Björnsson, forstöðumaður á Fyrirtækjasviði Landsbankans, mun fjalla um það hvort nóg sé komið af hótelum í Reykjavík og fara yfir þörfina fyrir uppbyggingu hótela í Reykjavík á næstu árum.

Síðastur tekur til máls Doug Lansky, sem fjallar um ólíkar hliðar á ferðaþjónustu, m.a. það sem gerir ferðamannastaði að vinsælum og farsælum áfangastöðum.

• 1 blogg um fréttina

Bloggað um fréttina

• Ólafur Örn Jónsson: Arðsemin fellst í að brjóta niður múra LÍÚ um gengið …