Viðskipti | mbl | 24.3.2015 | 15:43

Fagna endurskoðun tollakerfisins

Tollar eru lagðir á samkvæmt tollaskrá sem inniheildur yfir 12 þúsund tollanúmer, þ.á.m. innflutt matvæli. Guðmundur Rúnar Guðmundsson

Tollar hér á landi eru tæplega þrefalt hærri en í nágrannalöndum Íslands og neyslustýringaráhrif þeirra, þ.e. hversu misjafnlega tollarnir leggjast á ólíkar vörutegundir, eru tvöföld.

Hérlendis eru tollar lagðir á samkvæmt tollskrá sem inniheldur yfir 12.000 tollnúmer, sem er umtalsvert yfir alþjóðlegu meðaltali. Á sama tíma námu tekjur ríkissjóðs af tollum einungis 0,9% af heildartekjum ríkissjóðs árið 2013 eða 7 milljörðum króna.

Á þetta er bent í tilkynningu Viðskiptaráðs Íslands þar sem áætlunum stjórnvalda um heildarendurskoðun á tollakerfinu er fagnað. „Þrátt fyrir að þessar litlu skatttekjur hafa tollar hér á landi mikil áhrif á hegðun fólks. Þannig draga tollar úr vöruviðskiptum, flytja verslun úr landi og skekkja samkeppni á innlendum mörkuðum án þess að vega þungt í tekjuöflun hins opinbera,“ segir í tilkynningunni.

Bjarni Benediktsson, fjármála- og efnahagsráðherra, tilkynnti í umræðum á Alþingi í gær að endurskoðunar væri að vænta. Hann benti á að ríkissjóður hefði mjög litlar tekjur af tollum samanborið við þann kostnað sem fellur til vegna hins flókna kerfis. Einföldun á tollakerfinu væri því til hagræðis fyrir innflytjendur og hagsbóta fyrir neytendur.