Gat ekki átt bæði fyrirtækin

„Borgarstjóri er væntanlega að tala um ef og þegar arðgreiðslur verða hugsanlega 20 milljarðar á ári þá komi í ljós að söluverðið árið 2006 hafi verið of lágt. En arðgreiðslur eru að jafnaði 1,5 milljarðar á ári, það er raunveruleikinn.“

Þetta segir Halldór Halldórsson, oddviti Sjálfstæðisflokksins í borgarstjórn Reykjavíkur, á vefsíðu sinni í dag. Þar svarar hann ummælum Dags B. Eggertssonar borgarstjóra nýverið þess efnis að hlutur borgarinnar í Landsvirkjun hafi verið seldur á of lágu verði fyrir tæpum áratug síðan. Spár um mögulegar framtíðararðgreiðslur fyrirtækisins væru til marks um það. Sjálfstæðismenn og framsóknarmenn mynduðu meirihluta í borgarstjórn þegar hlutur borgarinnar var seldur.

Halldór bendir á að verðið fyrir hlut Reykjavíkurborgar í Landsvirkjun hafi verið sameiginleg niðurstaða matsmanna allra eigenda fyrirtækisins. Þá hafi verið búið að gefa framleiðslu og sölu á orku frjálsa á þessum tíma og fyrir vikið hafi Reykjavíkurborg ekki getað verið eigandi að bæði Orkuveitu Reykjavíkur og Landsvirkjun enda væru félögin í samkeppni á raforkumarkaði.

„Það vissi auðvitað enginn árið 2006 hvernig Landsvirkjun og verðmæti hennar myndi þróast. Vinstri menn hafa nú meira og minna verið á móti öllum verkefnum Landsvirkjunar sem skapa henni arð þannig að árið 2006 höfðu borgarfulltrúar kannski áhyggjur af því að Landsvirkjun myndi dala í verði,“ segir Halldór ennfremur.

Velta megi málinu endalaust fyrir sér. Þannig megi allt eins reikna dæmið út frá núverandi arðgreiðslum á þann veg að Reykjavíkurborg hafi hagnast mjög á sölu hluts síns í Landsvirkjun miðað við þróunina til þessa. „Það er a.m.k. ekki hægt að sýna fram á það ennþá að þetta hafi verið vondur díll þarna árið 2006.“

• 1 blogg um fréttina

Bloggað um fréttina

• Ómar Ragnarsson: Framsýni 1965 en afglöp 2006.