Stendur fast við verðkönnun

„Ég stend fast við könnunina og dreg hana ekki til baka vegna óánægju um að hún hafi ekki verið framkvæmd fyrr,“ segir Kristjana Birgisdóttir, verkefnastjóri verðlagseftirlits ASÍ.

Orms­son og Sam­sung setrið hafa gagnrýnt vinnubrögð ASÍ við verðkönn­un á heim­ilis­tækj­um vegna af­náms vöru­gjalda og farið fram á að hún verði dreg­in til baka. Bent er á að könn­un­in hafi verið gerð í byrj­un októ­ber en hins veg­ar hafi verð í versl­un­um fyr­ir­tækj­anna verið lækkuð sem nam vöru­gjöld­um hinn 17. sept­em­ber 2014. Ályktanir ASÍ séu því rangar.

Frétt mbl.is: Harma verðkönnun ASÍ

Aðspurð hvort þetta geri könnunina ómarktæka segir hún svo ekki vera. „Verðkönnunin stendur alltaf. Þetta er bara mæling á verðbreytingum frá viku 41 og til viku 16.“

Þá segist hún vel geta skilið að fyrirtækin séu ósátt við að könnunin hafi verið framkvæmd þarna en ekki daginn eftir að tilkynnt var um að vörugjöldin yrðu afnumin. Verðlagseftirlitið hafi hins vegar ekki verið látið vita um áformin og því hafi ekki verið hægt að undirbúa könnun fyrr.

Verðlækkanir ekki í samræmi við væntingar

Niðurstaða ASÍ var sú að verðlækk­an­ir á heim­ilis­tækj­um væru mun minni en gert var ráð fyrir. Þar seg­ir að gera hafi mátt ráð fyr­ir að verð myndi lækka um meira en 19%. Í reynd hefðu verð í 41% til­vika lækkað um meira en 20% en í 20% til­vika hefði verð á heim­ilis­tækj­um hækkað eða staðið í stað.

Kristjana bendir á að fyrirtækin hafi ekki verið búin að skila öllum verðlækkunum. „Ef svo hefði verið hefði væntanlega ekki komið út sama verð.“

Hún segir að 13% varanna sem skoðaðar voru hafi ekki haggast í verði. Það þýði að virðisaukaskatturinn hafi ekki einu sinni verið lækkaður. 

Verðkönnun ASÍ

Kristjana stendur við verðkönnunina. mbl.is/Hjörtur

• 1 blogg um fréttina

Bloggað um fréttina

• Þorsteinn Siglaugsson: Hvert er eiginlega markmiðið?