Íbúðaverð á höfuðborgarsvæðinu hækkaði um 8,5%

Íbúðaverð á höfuðborgarsvæðinu hækkaði á síðasta ári um 8,5% milli ára. Það hefur haldið áfram að hækka það sem af er þessu ári og var um 10% hærra á fyrsta fjórðungi ársins miðað við sama tíma í fyrra.

Á sama tímabili fjölgaði þinglýstum kaupsamningum á höfuðborgarsvæðinu um 11,5% og leiguverð hækkaði um 8,5%.

Þetta kemur fram í Peningamálum Seðlabanka Íslands sem komu út fyrr í vikunni.

Þar segir að hækkun húsnæðisverðs hafi að mestu stafað af verðhækkunum fjölbýlis enda hafi verið skortur á minni íbúðum að undanförnu. Verð á sérbýli hefur þó tekið við sér á fyrsta fjórðungi ársins. Ein möguleg skýring sé að eftirspurn eftir sérbýli hafi aukist vegna þess aðð verðið var orðið hagstætt miðað við verð á íbúðum í fjölbýli.

Segir jafnframt að hækkun íbúðaverðs sé í ágætum takti við helstu efnahagsstærðir. Þannig hafi hlutfall íbúðaverðs af tekjum og byggingarkostnaði verið um eða rétt yfir langtímameðaltali sínu um nokkurt skeið, ólíkt því sem sést í mörgum öðrum OECD-ríkjum.

Seðlabankinn bendir einnig á að raunverð atvinnuhúsnæðis á höfuðborgarsvæðinu hafi einnig hækkað töluvert að undanförnu og velta aukist. Verðið hafi verið um 18% hærra á fyrsta fjórðungi ársins miðað við sama tímabil í fyrra og hafi hækkað um tæplega helming frá því að það var lægst á fjórða ársfjórðungi 2011. Það sé nú orðið hærra en það hafi verið að meðaltali frá árinu 1990.

• Blogga um frétt