Verðbólgan eykst hraðar en spáð var

Vísitala neysluverðs í júlí hækkaði um 0,16% frá fyrri mánuði, að því er kemur fram í nýjum tölum frá Hagstofu Íslands.

Verðbólgan hefur því hækkað um 1,9% síðustu tólf mánuði. Þetta er meiri hækkun neysluvísitölu en greiningardeildir stóru bankanna þriggja gerðu ráð fyrir í spám sínum, en þær lágu á bilinu 0,2% lækkun til 0,1% hækkun vísitölunnar á milli mánaða.

Með þessu áframhaldi er útlit fyrir að verðbólgan fari yfir verðbólgumarkmið Seðlabankans, sem er 2,5%, strax í september, samkvæmt bráðabirgðaspá í Morgunkorni Íslandsbanka, sem fjallað er um í Morgunblaðinu í dag.