Viðskipti | mbl | 7.8.2015 | 11:07

Sögulegt met í gjaldeyriskaupum

Gjaldeyriskaup Seðlabankans í júlí voru þau mestu í einum mánuði frá upphafi. mbl.is/Árni Sæberg

Gjaldeyriskaup Seðlabankans í júlí voru þau mestu í einum mánuði frá upphafi. Alls keypti bankinn 265 milljónir evra á millibankamarkaði með gjaldeyri í síðasta mánuði, og var hlutdeild hans í heildarveltunni á gjaldeyrismarkaði ríflega 61 prósent.

Til samanburðar keypti Seðlabankinn 201 milljón evra í júnímánuði, sem var þá langstærsti mánuðurinn fram að því hvað gjaldeyriskaup bankans varðar. Í júlí í fyrra námu gjaldeyriskaupin 83 milljónum evra, og er því um ríflega þreföldun að ræða í nýliðnum júlí frá sama mánuði fyrir ári síðan.

Þetta kemur fram í morgunkorni Greiningar Íslandsbanka.

Það sem af er ári hefur Seðlabankinn keypt 816 milljónir evra á millibankamarkaði inn í gjaldeyrisforða sinn en það er 140 prósentu aukning frá síðasta ári. Ríflega helmingur kaupanna í ár átti sér stað í júní og júlí en það endurspeglar mikið hreint gjaldeyrisinnflæði til Íslands á tímabilinu þar sem gengi krónu hefur á sama tíma styrkst lítillega.

Samkvæmt tölum Seðlabankans nam hreinn gjaldeyrisforði, þ.e. gjaldeyriseignir að frádregnum öllum skuldum í gjaldeyri, andvirði 119 milljarða króna í júnílok. Hafði forðinn þá rúmlega tvöfaldast á þennan kvarða frá áramótum, en þá nam hann 47 milljörðum króna.

Sterkari staða en reiknað var með

Íslandsbanki hefur áður áætlað að forðinn gætu numið um 120 til 130 milljörðum króna í lok ársins en talið er að miðað við þróunina undanfarið og útlit fyrir gjaldeyrisflæði á komandi mánuðum gæti það mat reynst varfærið.

„Staða gjaldeyrisforðans verður því væntanlega mun sterkari í árslok en raunin var í ársbyrjun 2014, þegar hreinn forði var neikvæður, og burðir Seðlabankans til að draga úr áhættu vegna greiðslujafnaðaráfalls að sama skapi meiri.“

Bent er á að hin hliðin á gjaldeyriskaupunum sé sú að Seðlabankinn er í raun að fjölga krónum í umferð þegar hann safnar í forðann.

Hins vegar hefur bankinn bent á að á móti gjaldeyriskaupunum hafi peningamagn minnkað með auknum innstæðum í Seðlabankanum og sölu eigna ESÍ.

„Stærsti þátturinn í þróun peningamagns tengt losun hafta og gjaldeyrismarkaði á næstunni verður þó væntanlega ráðstöfun stöðugleikaframlags/-skatts slitabúanna á komandi misserum, en hún gæti leitt til töluverðrar minnkunar á peningamagni í umferð og vegið þannig gegn áhrifum gjaldeyriskaupanna,“ segir Greining Íslandsbanka.