Stofnandi hinnar vinsælu ASOS netverslunar er á förum frá fyrirtækinu eftir fimmtán ár í forstjórastóli. Þetta var tilkynnt seint í gær og hlutabréf féllu um sex prósent strax við opnun markaða í morgun. Félagið hefur þó aðeins rétt úr kútnum síðan.
Greinendur segja ákvörðun Nick Robertson ekki hafa komið á óvart þar sem hann hefur sífellt verið að veita Nick Beighton, sem tekur við sem forstjóri, meiri ábyrgð að undanförnu.
Robertson er þó ekki á förum frá fyrirtækinu þrátt fyrir að hann ætli ekki að vera í stjórnunarstöðu. Hann verður stjórnendum ennþá til ráðgjafar að einhverju leyti og á áfram 8,4 prósent hlut í fyrirtækinu. Engin ástæða fyrir breytingunum var gefin upp í tilkynningu.
Tekjur ASOS námu 975 milljónum punda á síðasta ári og jukust um 27 prósent milli ára. Hagnaður dróst hins vegar saman um 14 prósent en eldsvoði í einni verksmiðju fyrirtækisins hafði töluverð áhrif á reksturinn.