Swift þénar 125 milljónir á dag

Söngkonan Taylor Swift hefur þénað eina milljón dollara á dag, á hverjum degi þessa árs. Það jafngildir 125 milljónum íslenskra króna og þar með 5,2 milljóna króna tímakaupi eða 87 þúsund krónum á hverri einustu mínútu sólarhringsins.

The Express greinir frá því að Swift hafi þénað 317,8 milljónir dollara á þessu ári vegna plötusölu og nokkurra auglýsingasamninga. Swift á einnig þrjú fyrirtæki er sjá um plötusölu, umboðsstörf og tónleikaraðir og knýja þau tekjuvöxtinn enn frekar.

Hún er þar með orðin tekjuhæsti tónlistarmaður heims. Til samanburðar má benda á að þrír launahæstu hip-hop tónlistarmenn heims, þeir Diddy, Jay Z og Drake, þénuðu samanlagt 155,5 milljónir dollara á síðasta ári. Það er helmingi minna, ef tekjustreymi Swift verður áfram með sama móti út árið.

Swift er 25 ára gömul og í sambandi með plötusnúðnum Calvin Harris. Saman eru þau launahæsta par tónlistarheimsins samkvæmt Forbes.

• Blogga um frétt