Þurfa ekki kranann til að byggja

Fyrsta skóflustungan að íbúðarhúsnæði á Hlíðarenda verður tekin klukkan níu í fyrramálið. ÞG verktakar hafa sent Samgöngustofu beiðni um að fá að reisa byggingarkrana við neyðarbrautina svokölluðu en loka þarf flugbrautinni ef kraninn rís í flugstefnu hennar að sögn Isavia.

Þorvaldur Gissurarson, eigandi ÞG Verktaka, segist ekki hafa fengið svar frá Samgöngustofu en bætir við að byggingarkraninn sé ekki nauðsynlegur fyrir framkvæmdirnar. Vel sé hægt að byggja húsin án hans og er leyfið í raun aðeins formsatriði.

Hann segir þetta einungis vera hefðbundið ferli og hefðbundna fyrirspurn þegar byggt er í nálægð við flugvelli.

Að sögn Þorvaldar gætu framkvæmdir á svæðinu tekið um tvö ár.

Í Morgunblaðinu í dag var haft eftir Guðna Sigurðssyni, upplýsingafulltrúa Isavia, að það væri ljóst að flugi þyrfti að beina á aðrar brautir ef byggingakranar risu í flugstefnu neyðarbrautarinnar.

Mikil byggð mun rísa á Hlíðarenda á næstu árum en bú­ast má við allt að 800 til 850 íbúðum á svæðinu.

• 2 blogg um fréttina

Bloggað um fréttina

• Jóhann Elíasson: Á EKKERT AÐ BREGÐAST VIÐ?
• Torfi Kristján Stefánsson: Renna á rassinn með hótunina!