Stýrivextir hækka vestanahafs

Seðlabanki Bandaríkjanna hækkaði stýrivexti í dag í fyrsta sinn í sjö ár. Vextirnir hafa staðið nærri núlli frá 2008 en voru hækkaðir um 0,25%. Í yfirlýsingu frá bankanum sagði að efnahagslífið hefði tekið við sér, að neysla og fjárfestingar hefðu aukist, og að frekari bati hefði átt sér stað á húsnæðismarkaði.

Janet Yellen seðlabankastjóri sagði á blaðamannafundi að ákvörðun bankans markaði endalok tímabils þar sem stýrivöxtunum hefði verið haldið nærri núlli til að styðja við efnhagsbata í kjölfar verstu fjármálakrísu sögunnar frá Kreppunni miklu.

Hún sagði mikið vatn runnið til sjávar frá efnahagshruninu 2008 en að normalísering myndi eiga sér stað með tíð og tíma.

Ný störf hafa orðið til í Bandaríkjunum í hverjum mánuði síðan í október 2010. Sumir hafa lýst efasemdum um ágæti stýrivaxtahækkunarinnar, m.a. vegna vinnumarkaðarins en mikill fjöldi fólks hefur hætt atvinnuleit.

Hækkanir urðu á mörkuðum í aðdraganda ákvörðunarinnar, sem þykir til marks um að Bandaríkin séu komin á beinu brautina eftir hrunið. Það var Ben Bernanke, fyrrverandi seðlabankastjóri, sem markaði núllvaxtastefnuna, sem hann fylgdi eftir með svokallaðri magnbundinni íhlutun.

• 1 blogg um fréttina

Bloggað um fréttina

• Páll Vilhjálmsson: Hagfræðitilraun lýkur - ESB í kreppugír