Skattar á fjölskyldu lækkað um 400.000

Segja má að skattar á hverja fjölskyldu hafi að meðaltali lækkað um 400.000 krónur á ári ef allar skattalækkanir ríkisstjórnarinnar eru teknar saman. Þetta sagði Bjarni Benediktsson, fjármálaráðherra, á skattadegi Deloitte í morgun.

Bjarni tók saman aðgerðir ríkisstjórnarinnar í skattamálum og tíndi þar m.a. til breytingar á tollum og vörugjöldum, tekjuskatti, persónuafslætti, virðisaukaskatti og stimpilgjöldum. Þetta hefði gerst á sama tíma og fjárlagagatinu hefði verið lokað.

„Mín upplifun á þjóðfélagsumræðunni er að ríkið eigi að leysa alla hluti fyrir fólk,“ sagði Bjarni. „Það er ekki til nein sjálfstæð náttúruleg uppspretta skattfjár.“

„Það er einhver ranghugmynd í gangi um að ég búi yfir sérstakri kistu opinbers fjár,“ sagði hann. „Hún er ekki til. Það er bara til skattfé sem greitt er af fólkinu í landinu eða lögaðilum,“ sagði Bjarni og bætti við að allar breytingar hefðu áhrif á þá sem eru uppspretta teknanna.

Bjarni ræddi jafnframt hugmyndir um sérstakan hátekjuskatt og sagðist ekki hlynntur því. Hann vísaði til þess að rökrétt samhengi vantaði í umræðurnar, þegar sömu aðilar væru að krefjast launahækkana hjá þeim hópum sem eru með tekjur í þriðja skattþrepi, eða um 800 þúsund krónur, og að krefjast hátekjuskatts hjá sama hóp á sama tíma.

• 1 blogg um fréttina

Bloggað um fréttina

• Geir Ágústsson: Góð byrjun en bara það