Verðbólgan tvisvar verið lægri á 60 árum

Verðbólgan á síðasta ári var sú lægsta í yfir 20 ár og ef spá Capacent gengur eftir um 0,8 prósent lækkun vísitölu neysluverðs í janúar lækkar 12 mánaða verðbólgan úr tveimur prósentum í 1,9 prósent.

Verðbólga síðasta árs var 1,6 prósent að meðaltali og þarf að fara aftur til ársins 1994 til að finna lægri verðbólgu. Á síðustu 60 árum hefur hefur verðbólgan tvisvar verið lægri, árið 1994 er verðbólgan var 1,5 prósent og árið 1959 er verðbólgan var 1,3 prósent.

Þetta kemur fram í verðbólguspá Capacent fyrir janúarmánuð. Hinar árlegu vetrarútsölur munu að líkum vega þungt í verðmælingunni í janúar. Gert er ráð fyrir rúmlega 17,5 prósent verðlækkun á fatnaði að þessu sinni og myndi það hafa 0,84 prósent lækkunaráhrif á vísitölu neysluverð. 

Framangreind lækkun á fatnaði er þó litlu meiri en vanalega en talið er að afnám tolla af fatnaði muni koma inn af meiri þunga í verð fatnaðar við útsölulok þar sem nýjar vörur koma í hillurnar eftir jólin.

Auk fataútsala eru útsölur á húsbúnaði, raftækjum og húsgögnum alla jafna á þessum árstíma og er gert ráð fyrir að áhrif þeirra á vnv nemi um 0,1 prósent.

Olían lækkar og lækkar

Tunnan af hráolíu er komin niður fyrir 31 dollar og hefur verðið lækkað um 20 prósent frá því um miðjan desember.

Verð á eldsneyti hefur staðið í stað frá miðjum desember og hefur lækkun olíuverðs komið í veg fyrir hækkun eldsneytisverðs vegna aukinna álaga ríkisins.  Capacent gerir ráð fyrir lítilsháttar lækkun eldsneytisverðs á næstu dögum sem hefur 0,04 prósent áhrif á vnv til lækkunar.

Könnun Capacent á flugfargjöldum bendir til að lækkun flugfargjalda eftir hátíðarnar sé öllu minni en verið hefur. Á móti kemur að hækkun flugfargjalda fyrir jól var minni en venjulega. Könnun Capacent bendir til um fimm prósent lækkunar sem hefur 0,08 prósent áhrif á vnv til lækkunar.

Þá segir að hækkun fasteignaverðs hafi komið í veg fyrir algjört hrun vísitölunnar. Gert er ráð fyrir að hækkun húsnæðisliða hafi um 0,15 prósent áhrif á vnv til hækkunar.

Almennar verðskrárhækkanir eru algengar á þessum árstíma. Þar má t.d. nefna hækkanir á tómstundum, líkamsrækt og annarri þjónustu líkt og tryggingum. Hver hækkun vegur sáralítið en samantekið er gert ráð fyrir að framangreindar hækkanir hafi 0,1 prósent áhrif á vnv til hækkunar.

• 1 blogg um fréttina

Bloggað um fréttina

• Páll Vilhjálmsson: Lág verðbólga - krónan besti gjaldmiðillinn