Margrét Sanders til Strategíu

Margrét Sanders mun ganga til liðs við ráðgjafafyrirtækið Strategíu ehf. í mars. Margrét hefur á síðastliðnum sextán árum starfað sem eigandi og framkvæmdastjóri rekstrar hjá Deloitte.

Margrét er formaður Samtaka verslunar og þjónustu og situr einnig í framkvæmdastjórn og stjórn Samtaka atvinnulífsins. Auk þess er hún í stjórn Amerísk íslenska viðskiptaráðsins.    

Margrét er með viðskiptafræði- og MBA gráðu frá WCU háskólanum í Norður Karólínu í Bandaríkjunum, en samhliða námi og að því loknu starfaði hún við ráðgjöf hjá McLaurin Consulting í Bandaríkjunum. Margrét lauk einnig háskólanámi frá KHÍ.

Margrét hefur sinnt ýmsum stjórnar- og trúnaðarstörfum í gegnum tíðina. Þar á meðal í stjórnum sjúkrahúsa og heilsugæslu. Hún sat í verkefnastjórn Auðar í krafti kvenna auk þess sem hún vann að flutningi grunnskólans til sveitarfélaga á suðvesturhorninu o.m.fl.

Strategía er sérhæft ráðgjafarfyrirtæki sem veitir ráðgjöf til fjárfesta, stjórna og æðstu stjórnenda fyrirtækja og stofnana.   

Strategía starfar á flestum sviðum ráðgjafar við fjárfesta og stjórnendur, s.s. við stefnumótun, breytingastjórnun, stjórnendaþjálfun, lögboðna og góða stjórnarhætti, lögmannsþjónustu,  rekstur fyrirtækja og stofnana og ráðgjöf við fjárfestingar og fjármögnun.  

Núverandi meðeigendur og ráðgjafar Strategíu eru Guðrún Ragnarsdóttir, Helga Hlín Hákonardóttir hdl. og Svava Bjarnadóttir. 

• Blogga um frétt