Viðskipti | mbl | 16.3.2016 | 9:28 | Uppfært 9:43

Laun verkafólks hækkað mest

Regluleg laun voru að meðaltali 2,3% hærri á fjórða ársfjórðungi 2015 en á ársfjórðungnum á undan.

Laun verkafólks hækkuðu mest frá árslokum 2014 til ársloka 2015, eða um 11%, en laun stjórnenda minnst, eða um 5,9%. Á sama tíma hækkuðu regluleg laun þjónustu-, sölu- og afgreiðslufólks um 9,9%, sérmenntaðs starfsfólks um 9,7%, skrifstofufólks um 9,5% og iðnaðarmanna um 8,0%.

Í frétt Hagstofunnar kemur fram að regluleg laun hafi verið að meðaltali 2,3% hærri á fjórða ársfjórðungi 2015 en á ársfjórðungnum á undan. Árshækkun frá fjórða ársfjórðungi 2014 var 9,0% að meðaltali, hækkunin var 8,9% á almennum vinnumarkaði og 9,0% hjá opinberum starfsmönnum. Þar af hækkuðu laun ríkisstarfsmanna um 10,2% og laun starfsmanna sveitarfélaga um 7,6%.

Frá fyrri ársfjórðungi var hækkun reglulegra launa eftir starfsstétt á bilinu 1,1% til 3,1%. Laun sérmenntaðs starfsfólks hækkuðu mest en iðnaðarmanna minnst milli ársfjórðunga. Árshækkun frá fjórða ársfjórðungi 2014 var mest hjá verkafólki eða um 11,0% en minnst hjá stjórnendum eða um 5,9%.

Áhrifa kjarasamninga gætir

Frá fyrri ársfjórðungi, þ.e. innan ársins 2015, mældist hækkun reglulegra launa mest í fjármálaþjónustu eða um 3,9%. Þá hækkuðu laun á milli ársfjórðunga um 2,0% í samgöngum, 1,6% í verslun, 1,2% í iðnaði og 1,1% í byggingarstarfsemi. Árshækkun frá fjórða ársfjórðungi 2014 var mest í samgöngum eða um 10,3% en minnst í fjármálaþjónustu eða um 7,7%.

Í vísitölu launa á fjórða ársfjórðungi 2015 gætir áhrifa kjarasamninga opinberra starfsmanna við viðsemjendur sína. Að auki gætir áhrifa endurskoðunar á starfsmatskerfi sveitarfélaga, sem nær til aðildarfélaga BSRB og ASÍ. Í vísitölunni gætir einnig áhrifa kjarasamnings Samtaka atvinnulífsins við Samtök starfsmanna fjármálafyrirtækja.