Eigendur heildverslunar í Panamaskjölum

Eigendur heildverslunarinnar Ó Johnson & Kaaber hf. stofnuðu félag í Tortóla árið 2001 og notuðu það meðal annars til að kaupa hlutabréf í íslenskum fyrirtækjum af eignarhaldsfélagi sínu á Íslandi fyrir á fjórða hundrað milljónir króna.

Þetta kemur fram í umfjöllun Stundarinnar og Reykjavík Media sem unnin er upp úr Panamaskjölunum.

Félagið hét Eliano Management Corp. og fengu þau Guðrún Gunnlaugsdóttir Johnson og börn hennar öll prókúruumboð yfir félaginu í september 2010. Faðir þeirra, Ólafur H. Johnson, hafði látist í júní sama ár.  

Í umfjöllun Stundarinnar kemur fram að helsti tilgangur Tortólafélagsins virðist hafa verið að kaupa hlutabréf sem voru í eigu fyrirtækisins Johnson ehf. sem stofnað var í ársbyrjun árið 2002. Inni í þessu félagi voru hlutabréf að verðmæti 329 milljónir króna í desember árið 2002. Um var að ræða bréf í Eimskipafélagi Íslands upp á tæplega 173 milljónir, tæplega 81 milljón króna í Flugleiðum, auk bréfa í Sjóvá, Hampiðjunni og Tryggingamiðstöðinni. Öll þessi bréf voru seld inn í Tortólafélagið í lok árs 2002.

Greiðslan á kaupverðinu var lögð inn á reikning Johnson ehf. í Búnaðarbankanum en með þessu móti var hlutabréfum fjölskyldunnar á Íslandi komið í eigu félags í skattaskjóli.

Í ársreikningi Johnson ehf. fyrir árið 2002 kemur fram rúmlega 8 milljóna króna tap og er ekkert í ársreikningum sem gefur tilefni til að ætla að félagið hafi selt hlutabréf fyrir á fjórða hundrað milljónir króna á því ári.

370 milljóna króna lán

Eftir að samningurinn um kaupin á hlutabréfunum var undirritaður fékk Eliano Management Corp lán frá Landsbankanum í Lúxemborg upp á tæplega tvær milljónir dollara 19. desember 2002. Landsbankinn veitti svo frekari lán til félagsins árið 2004, 2005 og 2007 þannig að heildarlánveitingin fór upp í 4,2 milljónir evra, eða rúmlega 370 milljónir króna. 

Ítarlegri umfjöllun má lesa hjá Stundinni.

• 1 blogg um fréttina

Bloggað um fréttina

• Jóhann Elíasson: HVAÐ ER FRÉTTNÆMT VIÐ ÞAÐ AÐ EINHVERJIR EIGI FÉLÖG ERLENDIS?