Tryggingagjald lækkaði 1. júlí

Tryggingagjald var lækkað um 0,5 prósentustig 1. júlí síðastliðinn, eða úr 7,35 prósentum og niður í 6,85 prósent. Samtök atvinnulífsins segja þetta mikilvægt fyrsta skref en hvetja stjórnvöld til að standa við síðari lækkunaráfanga.

Á grundvelli samkomulags Samtaka atvinnulífsins við stjórnvöld um lækkun tryggingagjalds á næstu árum undirrituðu samtökin kjarasamning 21. janúar 2016 við ASÍ og aðildarfélög þess. Samkomulagið byggir á rammasamkomulagi aðila vinnumarkaðarins frá 27. október 2015 og felur m.a. í sér hærri almennar launabreytingar og aukið mótframlag atvinnurekenda til lífeyrissjóða.

Aftur sama lækkun 2017 og 2018

Samkomulaginu er ætlað að mæta að hluta auknum framlögum atvinnulífsins til lífeyrismála og fól í sér að tryggingagjaldið myndi lækka um 0,5 prósentustig um mitt ár 2016 og um sama hlutfall árin 2017 og 2018 að gefnum forsendum um lækkun skulda ríkisins. Þannig yrði gjaldið komið í svipað horf á árinu 2018 og það var fyrir bankahrunið.

Að mati SA var lækkun tryggingagjalds nauðsynleg forsenda þess að geta mætt kröfum um enn meiri launahækkanir og jöfnun lífeyrisréttinda milli almenna og opinbera vinnumarkaðarins án þess að raska efnahagslegum stöðugleika. 

• 1 blogg um fréttina

Bloggað um fréttina

• Kolbrún Hilmars: Breytir engu fyrir atvinnulífið