Viðskipti | mbl | 21.10.2016 | 19:35 | Uppfært 22.10.2016 0:03

Áfengissala í Fríhöfninni dregst saman

„Þeir sem notfæra sér aukninguna sem varð ef keyptur er eingöngu bjór eru ekki nógu margir til að vega upp á móti þeim sem kaupa helst minni bjór með sterku og léttu áfengi." mbl.is/Sigurgeir Sigurðsson

Sala á áfengi, í lítrum talið, hefur dregist saman í Fríhöfninni eftir að nýjar reglur um áfengiskaup ferðamanna tóku gildi.

Í sumarbyrjun var reglum um áfengiskaup ferðamanna breytt á þann veg að nú geta þeir nýtt allan tollinn til kaupa á aðeins sterku áfengi, léttvíni eða bjór. Áður þurfti að blanda saman sortum í samræmi við fimm ólíkar samsetningar. Fyrir þessa breytingu var í mesta lagi hægt að kaupa einn lítra af sterku áfengi en nú er hámarkið 1,5 lítrar og sá sem vill eingöngu vín getur nú tekið 6 flöskur í stað fjögurra. Á sama hátt getur ferðamaður sem aðeins kýs bjór keypt sex hálfs lítra kippur af öli en áður var hámarkið 4 kippur.

Greint er frá þessu á vef Túrista. Þar kemur fram að í forsendum frumvarps fjármálaráðherra um þennan nýja tollkvóta var hins vegar búist við aukinni sölu í komuverslun Fríhafnarinnar. Ástæðan fyrir þessari öfugu þróun er, að mati Þorgerðar Þráinsdóttur framkvæmdastjóra Fríhafnarinnar, sú að þær leiðir sem nutu mestra vinsælda í gamla kerfinu innihalda of margar áfengiseiningar miðað við nýja fyrirkomulagið.

„Þeir sem notfæra sér aukninguna sem varð ef keyptur er eingöngu bjór eru ekki nógu margir til að vega upp á móti þeim sem kaupa helst minni bjór með sterku og léttu áfengi. Þetta hefur leitt til þess að bjór hefur minnkað nokkuð í magni sem hlutfall af heildarsölu. Sjötíu prósent af þeim bjór sem seldur er í komuverslun Fríhafnarinnar er innlend framleiðsla og því hefur þetta nokkur áhrif á innlenda bjórframleiðendur og mun til lengri tíma geta haft töluverð áhrif á sölu á íslenskum bjór,” bætir Þorgerður við.

Frétt Túrista í heild má sjá hér.