3% samdráttur vegna viðskiptabanns
Setja bókamerki
Ísland situr í 20. sæti á lista yfir stærstu fiskveiðiþjóðir heims miðað við árið 2014 með um 1,4% hlutdeild á heimsvísu. Ísland hefur færst neðar á þessum lista síðustu ár þar sem aðrar þjóðir hafa aukið veiðar sínar umfram Ísland. Þetta kemur fram í skýrslu greiningardeildar Íslandsbanka um sjávarútveginn.
Deildin telur að útflutningur sjávarafurða muni taka við sér á seinni helmingi ársins, ekki síst vegna aukinna aflaheimilda í þorski. Þá er talið að útflutningur muni dragast saman um 1% á árinu 2016 en gert er ráð fyrir ríflega 4% aukningu í útflutningi sjávarafurða á árinu 2017 og rúmlega 3% aukningu árið 2018.
Mest veitt af loðnu en þorskurinn verðmætastur
Heildarafli á síðasta ári var 1.319 þúsund tonn og jókst aflinn um 22,5% frá árinu 2014. Mest var veitt af loðnu á árinu eða um 337 þúsund tonn og jókst loðnuaflinn um 218% frá árinu 2014. Aflaverðmæti ársins 2015 nam rúmlega 151 milljarði króna sem er 9,2% aukning frá árinu 2014 miðað við fast verðlag.
Þorskur er enn langstærstur þegar kemur að aflaverðmæti og nam aflaverðmæti hans tæpum 61 milljörðum króna á árinu 2015 eða sem nemur 40,3% af heildarverðmæti aflans. Verðmætaaukning þorsks nam 13% sem er 10 prósentustigum umfram aukningu í magni og hefur því verðmæti á hvert tonn aukist milli ára.
Þorskur var verðmætasta útflutningstegundin á síðasta ári en þá námu útflutningsverðmæti hans 105 milljörðum króna. Er það um 38% af útflutningsverðmæti sjávarafurða.
Samdráttur tengdur við viðskiptabann
Útflutt magn sjávarafurða á árinu 2015 nam tæpum 632 þúsund tonnum og er það um 3% lægra en árið 2014 og 83 þúsund tonnum undir langtíma meðaltali. Þessi samdráttur í útflutningi sjávarafurða milli ára skýrist einna helst af viðskiptabanni Rússlands. Þrátt fyrir þetta námu verðmæti útflutnings á árinu 2015 um 265 milljörðum króna sem er tæpum 17 milljörðum króna meira en á árinu 2014 miðað við verðlag ársins 2015.
Tekjur sjávarútvegsfélaga á árinu 2015 námu 275 milljörðum króna og jukust um 9 milljarða króna á föstu verðlagi eða um 3,3%. Skýrist þessi vöxtur í tekjum af auknum loðnuveiðum og auknu verðmæti þorskaflans vegna verðhækkunar á erlendum mörkuðum.
18% til Bretlands
Í niðurstöðum skýrslunnar er bent á að gengi krónunnar hafi styrkst um 17% frá upphafi árs og 26% frá upphafi síðastliðins árs gagnvart viðskiptaveginni gengisvísitölu. Hefur gengi krónunnar styrkst mest gagnvart bresku pundi eða um 41% frá upphafi árs. Bretland er eitt af stærstu viðskiptalöndum Íslands og fara um 18% af heildarútflutningsverðmæti sjávarafurða til Breta. Hefur því gengislækkun pundsins gagnvart krónunni talsverð áhrif á utanríkisviðskipti.
Norðmenn eru stærstir í fiskeldi í Evrópu með um 45% hlutdeild. Ísland situr í 25. sæti á meðal fiskeldisþjóða í Evrópu með 8 þúsund tonn eða um 0,3% af heildarfiskeldi álfunnar.
Útflutningsverðmæti eldisfisks árið 2015 var um 7 milljarðar króna samanborið við 5,5 milljarða króna árið 2014 á föstu verðlagi. Bandaríkin eru sem fyrr stærsti markaðurinn fyrir íslenskar eldisafurðir með um 35% af heildarverðmæti ársins 2015. Bretland kemur þar á eftir með um 9,3% og Þýskaland með um 7,5%.
Útgefin leyfi til framleiðslu fiskeldis eru mest á Vestfjörðum og Vesturlandi en þar eru leyfi fyrir 21.698 tonna ársframleiðslu. Hafa rekstrarleyfi til framleiðslu fiskeldis stækkað um 2.320 tonn frá árinu 2014.
Myndskeið: Skriða féll nærri ferðamönnum
Ógn við netöryggi fer vaxandi
Þjálfun á dýnum og vopnuð í hermi
„Mjög sátt og í takti við það sem við reiknuðum með“
„Mann langar að drepa sig þarna, gjörsamlega“
Áburðarverksmiðja föl fyrir 190 milljónir
„Ekki hægt að hækka skatta og þvo sér síðan um hendur“