Planið gekk upp

Planið svokallaða, aðgerðaáætlunin sem Orkuveita Reykjavíkur hefur fylgt frá því snemma árs 2011, gekk upp og vel það. Það átti að skila liðlega 50 milljörðum króna í betri sjóðstöðu en niðurstaðan varð um 60 milljarðar. Þetta kemur fram í lokaskýrslu fyrirtækisins um Planið sem lauk um áramót.

Ársreikningur OR fyrir árið 2016 var samþykktur af stjórn í dag. Rekstrarafkoma er svipuð og síðustu ár en hátt gengi  íslensku krónunnar skilar fyrirtækinu verulegum reiknuðum hagnaði. Hagnaðurinn nam 13,4 milljörðum króna á árinu. Arðsemi eigin fjár var 12,0%.

Samkvæmt lokaskýrslu Plansins batnaði sjóðstaða OR um 60,2 milljarða króna vegna aðgerðanna sem gripið var til. Upphaflegt markmið var 51,3 milljarðar króna. Mest munar um að innri aðgerðir fyrirtækisins skiluðu 20% meiru en lagt var upp með. Ytri þættir Plansins skiluðu 13% umfram markmið. Í heildina fengust tæp 18% af árangri Plansins með gjaldskrárbreytingum.

Sparnaður í rekstriOR á tímabili Plansins nam átta milljörðum króna og var 60% umfram upphafleg markmið.

Bjarni Bjarnason, forstjóri Orkuveitunnar. mbl.is/Golli

Lægri rekstrarkostnaður en 2010

Í ársreikningnum sem samþykktur var í dag kemur fram að rekstrarafkoma fyrirtækjanna í samstæðu OR er stöðug og góð. Rekstrarhagnaður EBIT nam 15 milljörðum króna, sem er 3,7% betri afkoma af rekstri en 2015. Rekstrartekjur uxu um 1,1 milljarð króna milli áranna 2015 og 2016 og gjöldin um 880 milljónir. Kjarasamningsbundnar launahækkanir eiga talsverðan þátt í vaxandi kostnaði en einnig hefur verkefnum fjölgað með auknum umsvifum í samfélaginu og rekstur notkunarmæla er aftur kominn í hús eftir útvistun.

Ef litið er til áranna 2010 til 2016 og miðað er við fast verðlag sést meðal annars að rekstrargjöld ársins 2016 voru lægri að raunviði en ársins 2010. Þetta má rekja til þess niðurskurðar á rekstrarkostnaði sem ráðist var í við upphaf Plansins og aðhalds í rekstri síðan. OR og dótturfyrirtækin munu búa að þeirri sparnaðarmenningu sem byggð hefur upp til framtíðar. Um síðustu áramót skilaði sparnaður í rekstri sér beint til viðskiptavina þegar ýmis veitugjöld voru lækkuð.

Gengisáhrif á heildarniðurstöðu ársins

Samanlagðir fjármagnsliðir ársreiknings OR voru jákvæðir í fyrsta skipti um árabil. Mest munar um að hækkað gengi krónunnar hefur þau áhrif að erlend lán eru metin á færri krónur en áður og mismunurinn er færður fyrirtækinu til tekna í ársreikningnum. Gengismunur nam 8,5 milljörðum króna samkvæmt ársreikningnum .

OR hefur greitt niður skuldir jafnt og þétt síðustu ár. Lækkun nettóskulda frá árinu 2009 nemur tæpum 100  milljörðum króna. Samhliða hefur eiginfjárhlutfall nærri þrefaldast.

• 1 blogg um fréttina

Bloggað um fréttina

• Þorsteinn Siglaugsson: Þökkum það sem vel er gert