Fær 1,8 milljónir á dag

Fjárfestingafyrirtækið BlackRock hefur ráðið George Osborne, fyrrverandi fjármálaráðherra Bretlands, til starfa og hljóða launagreiðslur hans upp á 650 þúsund pund á ári en það jafngildir 86 milljónum króna á núverandi gengi.

Það sem athygli vekur er að samkvæmt ráðningarsamningi sem skilað var inn til breska þingsins þarf Osborne einungis að vinna 48 daga á ári. Fær hann samkvæmt því greidd 13.500 pund á dag eða um 1,8 milljónir króna.

Osborne var ráðinn sem ráðgjafi hjá fyrirtækinu og var tilkynnt um ráðninguna í janúar. Mun Osborne fyrst og fremst veita ráðgjöf um evrópsk stjórnmál, kínverskan efnahag og lífeyrisgreiðslur.

Osborne er sá nýjasti í röð breskra pólitíkusa sem ráðnir hafa verið inn til stórra banka eða fjárfestingafyrirtækja. Alistair Darling, fyrrverandi fjármálaráðherra, situr í stjórn Morgan Stanley og William Hague, fyrrverandi utanríkisráðherra, var ráðinn til Citigroup fyrr á þessu ári. Þá var Gordon Brown, fyrrverandi forsætisráðherra, í fyrra ráðinn sem ráðgjafi hjá verðbréfafyrirtækinu Pimco. 

• 1 blogg um fréttina

Bloggað um fréttina

• Geir Ágústsson: Pólitísk áhrif til sölu