Verðbólguþróun hér á landi ræðst eftir húsnæðisverði og ef ekki væri fyrir hækkanir á þeim markaði hefði orðið verðhjöðnun hér á landi á síðasta ári. Hagstofan birti í morgun tölur yfir vísitölu neysluverðs. Þar kemur fram að síðastliðna tólf mánuði hef­ur vísi­tala neyslu­verðs hækkað um 1,7% en vísi­tal­an án hús­næðis hef­ur lækkað um 2,6%.

Frétt af mbl.is

Verðbólga mælist 1,7% í maí

Í samtali við mbl.is segir Erna Björg Sverrisdóttir, hjá greiningardeild Arion banka þetta áhugaverðar tölur sem sýni hvað húsnæðisliðurinn er stór. „Það er hann sem er algjörlega að drífa áfram verðbólguna. Hvernig verðbólgan mun þróast ræðst núna af því hvernig húsnæðisverðið fer.“

Erna segir að greiningardeildin spái því að húsnæðisliðurinn muni að öllum líkindum halda áfram að hækka næstu misseri. „Það getur farið að hægja á hækkunum en það verða engu að síður verulegar hækkanir. Á móti vegur gengisstyrking og aukin samkeppni en maður sér ekki mikil merki um innlendan verðbólguþrýsting nema á húsnæðismarkaði,“ segir Erna.

Hún segir stöðuna á húsnæðismarkaði áhyggjuefni. „Við hérna á deildinni höfum bent á það eins og margir aðrir að það þurfi að byggja meira. Þessar hækkanir eru drifnar áfram af framboðsskorti. Það hefur verið ágætt jafnvægi en núna er verðið að fjarlægast undirliggjandi stærðir og farið að hækka meira en t.d. kaupmáttur launa, sem eru fyrstu merki um ójafnvægi í hagkerfinu.“

Erna segir að það verði áhugavert að fylgjast með verðbólguþróuninni næstu vikur og mánuði. „Næstu verðbólgutölur verða þær fyrstu eftir að Costco opnar og það verður áhugavert að sjá hvernig það kemur út í verðmælingum Hagstofunnar.“

Tengdar fréttir

Húsnæðismarkaðurinn

Búseta skortir byggingarlóðir

• Horfa út fyrir Reykjavík vegna bílstæðaskorts
• „Það er verið að byggja rangar íbúðir“
• Skortur á bílastæðum fælir frá
• Sjö af 160 íbúðum seldust

» Fleiri tengdar fréttir

• 2 blogg um fréttina

Bloggað um fréttina

• Geir Ágústsson: Gallaður mælikvarði á kaupmátt krónunnar
• Ásgrímur Hartmannsson: Það er kreppa ennþá