Hagkerfið tekið að kólna

Efnahagshorfur á Íslandi hafa breyst á skömmum tíma og nú er útlit fyrir töluvert minni hagvöxt. Það kallar á aðlögun í hagkerfinu.

Í umfjöllun um mál þetta í Morgunblaðinu í dag segir Halldór Benjamín Þorbergsson, framkvæmdastjóri Samtaka atvinnulífsins (SA), hagkerfið vera að breyta um takt. Það séu ekki lengur horfur á verulegum hagvexti.

„Þvert á móti er framboð og eftirspurn að mætast. Það hefur ekki gerst undanfarin ár. Framleiðsluslakinn er meiri en verið hefur.“ Halldór Benjamín segir vísbendingar um að hagkerfið sé að kólna. Ein þeirra er aukið atvinnuleysi. Stjórnvöld þurfi að horfast í augu við breytta stöðu og sýna á spilin í kjaramálum. Endurskoða þurfi tryggingagjald og efla hlut vinnumarkaðstengdra sjóða. SA telji fyrirtæki eiga inni lækkun tryggingagjalds. Um það séu „allir sammála“.