Aðför að upplýstu samfélagi

„Ef við getum ekki sammælst um að nýta okkur alþjóðlegar samanburðartölur um hagvöxt, kaupmátt, jöfnuð o.s.frv. þá gætum við allt eins hætt að telja mörkin í fótboltaleikjum og látið bara tilfinninguna segja okkur hvort við erum að vinna eða tapa.“

Þetta skrifar Ásta Fjeldsted, framkvæmdastjóri Viðskiptaráðs, í grein sem birtist í ViðskiptaMogganum í dag. Þar skýtur hún föstum skotum á Ragnar Þór Ingólfsson, formann VR, vegna ummæla hans um opinberar hagtölur. Í þættinum Þjóðbraut, á sjónvarpsstöðinni Hringbraut, sagði Ragnar Þór að ekki væri hægt að reiða sig á opinberar hagtölur eins og frá OECD og Eurostat vegna þess að þær lýstu ekki raunveruleikanum. 

Ásta skrifar að það komi á óvart að ekki glennist fleiri augu af undrun þegar forystumaður í verkalýðshreyfingu hafni tölfræði og staðreyndum. 

„Sé ætlunin að hafna alfarið slíkri viðurkenndri aðferðafræði en treysta fremur á heimagerðar rannsóknir á sérvöldum og hentugum hópum verður ekki annað séð en að búið sé að taka ákvörðun um að kasta fyrir róða upplýstri umræðu, en taka í staðinn upp ósiðina úr amerískri pólitík.“

Hún segir á að þótt opinberar rannsóknir séu ekki heilagar, og engin ein rannsókn segi alla söguna, sé galin hugmynd að hafna með öllu að nýta sér bestu mögulegu samanburðargögn.