Mesti vöxtur í sögu Bandaríkjanna

Verg landsframleiðsla í Bandaríkjunum óx um 33,1% í þriðja ársfjórðungi þessa árs, á ársgrunni. Er þetta mesti vöxtur í sögu landsins en áður hafði mesta aukningin  í einum ársfjórðungi verið 16,7%. Þetta er meðal þess sem fram kemur í atvinnuleysistölum vestanhafs. 

Vöxturinn núna kemur í kjölfar 5% samdráttar á fyrsta ársfjórðungi og 31,4% samdráttar á öðrum ársfjórðungi. Þegar miðað er við sama ársfjórðung í fyrra er samdrátturinn á þriðja ársfjórðungi í ár 2,9%.

Kemur vöxturinn milli ársfjórðunga núna í kjölfar afléttingar takmarkana og reglna í fjölda ríkja vestanhafs. Svo virðist jafnframt sem bandarískt hagkerfi sé nú að rétta úr kútnum eftir mestu niðursveiflu sögunnar í kjölfar heimsfaraldurs kórónuveiru.

Einkaneysla eykst mikið 

Á sama tíma jókst neysla vestanhafs um 40,7% í ársfjórðungnum sem jafnframt er tvöfalt meiri vöxtur en áður hafði þekkst, eða allt frá árunum eftir seinni heimsstyrjöldina. Þó má að mestu rekja vöxtinn til mikillar niðursveiflu í öðrum ársfjórðungi.  

Ekki eru þó einvörðungu jákvæðar fréttir því enn eru fjölmargir Bandaríkjamenn á atvinnuleysisskrá eða 11 milljónir hið minnsta. Munar þar mest um töpuð störf innan ferðaþjónustufyrirtækja. 

Frétt af mbl.is

Magnaður viðsnúningur í Bandaríkjunum

• 1 blogg um fréttina

Bloggað um fréttina

• Ingólfur Sigurðsson: Mesti vöxtur í sögu Bandaríkjanna - þrátt fyrir kreppuna, og …