S&P reikn­ar með efnahagsbata á næsta ári

Alþjóðlega mats­fyr­ir­tækið S&P Global Rat­ings hef­ur staðfest A/​A-1 láns­hæfis­ein­kunn­ir rík­is­sjóðs Íslands með stöðugum horf­um. Greint er frá þessu á vef Stjórn­ar­ráðsins.

S&P reiknar með efnahagsbata á næsta ári eftir 7,8% samdrátt hagkerfisins í ár. Þótt orðið hafi verulegt högg í ferðaþjónustu gerir matsfyrirtækið ráð fyrir að afgangur verði á viðskiptajöfnuði næstu árin.

Þrátt fyrir verulegan stuðning opinberra fjármála við hagkerfið gegn áhrifum faraldursins gerir matsfyrirtækið ráð fyrir að stjórnvöldum takist að rétta af opinber fjármál eftir 2021. Í því samhengi lítur matsfyrirtækið til árangurs í þeim efnum síðasta áratug en sterk ytri staða veitir hagkerfinu frekari viðnámsþrótt.

Fram kemur í fréttatilkynningu S&P að lánshæfismat ríkissjóðs gæti hækkað ef efnahagsbatinn frá heimsfaraldrinum verður umfram væntingar og leiðir til aukinnar fjölbreytni í íslensku efnahagslífi og útflutningi sem draga myndi úr sveiflum í viðskiptakjörum. Við slíkar aðstæður gæti orðið hraðari viðsnúningur í ríkisfjármálum.

Þá gæti lánshæfismat ríkissjóðs lækkað ef heimsfaraldurinn veldur varanlegra tjóni á framleiðslugetu hagkerfisins en gert er ráð fyrir og ef það hefði í för með sér verulega hækkun opinberra skulda sem hlutfall af landsframleiðslu umfram væntingar.

• 1 blogg um fréttina

Bloggað um fréttina

• Jóhannes Ragnarsson: Þegar auðnuleysingjar fjármagnsins fjölga ferðum til spákerlinga og galdrakarla