ON setur 600 milljóna króna götulýsingu á sölu

Orka náttúrunnar, ON, hefur auglýst götulýsingarþjónustu sína til sölu. Tekjur ON af þjónustunni árið 2021 námu 588,7 milljónum króna, sem nemur 2,61% af heildartekjum fyrirtækisins.

Í auglýsingunni kemur fram að götulýsing ON sé rekstrareining sem hefur þjónustað sveitarfélög, opinberar stofnanir og einkaaðila í áratugi. Þá segir að mörg af stærstu sveitarfélögum landsins treysti á þjónustu ON sem hafi umsjón með framkvæmd og viðhaldi götulýsingar. Sveitarfélögin sem ON þjónustar eru Reykjavík, Mosfellsbær, Seltjarnarnes og Akranes.

Morgunblaðið innti ON eftir því hvað fylgdi með í kaupunum. Í skriflegu svari segir að um sé að ræða framsal á samningum og eignum sem falli undir rekstrareininguna, þ.e. þjónustusamningar, verkfæri og birgðir, ásamt ráðningarsamningum starfsmanna eftir samningsatriðum. 

Nánari umfjöllun er að finna í Morgunblaðinu sem kom út 26. september.