Straumur, íslenskt fyrirtæki í greiðslumiðlun og dótturfélag Kviku banka, hefur skrifað undir
samstarfssamning við fjártæknifyrirtækið Adyen um færsluhirðingu og vöruþróun á sviði fjártækni.
Adyen er alþjóðlegt fyrirtæki í fjármálaþjónustu með aðsetur í Hollandi og sér meðal annars um greiðslur fyrir H&M, Spotify, Uber, Electrolux og Microsoft. Adyen, sem stofnað var árið 2016, er eitt fremsta fjártæknifyrirtæki heims á sviði stafrænna greiðslna, gagnastjórnunar og fjármálasamþættingar.
Lilja Ólafsdóttir, framkvæmdastjóri Straums, segir að starfsmenn Straums séu staðráðnir í að bjóða upp á framúrskarandi greiðslulausnir fyrir söluaðila.
„Nálgun okkar gengur út fyrir hefðbundna greiðslumiðlun; við lítum á okkur sem samstarfsaðila viðskiptavina okkar og viljum hjálpa þeim að vaxa. Samstarfið við nýjan öflugan færsluhirði gerir okkur kleift að auka tæknilega getu og þjónustuframboð okkar verulega,“ segir Lilja í tilkynningu.
Tobias Lindh, framkvæmdastjóri Adyen Nordics & Baltics segir að Ayden sé stolt af því að vinna með samstarfsaðilum sem drífa heim greiðslulausna áfram.
„Þess vegna erum við spennt fyrir að koma inná íslenska markaðinn í samstarfi við Straum sem færsluhirðir þeirra. Vöru- og þjónustuframboð Straums í greiðslumiðlun á Íslandi ásamt fjártæknilausnum okkar mun tryggja auðveldari, öruggari og einfaldari greiðslur fyrir íslenska neytendur um allt land,“ segir Tobias Lindh í tilkynningunni.