Icelandair og SMBC Aviation Capital hafa undirritað samning um langtímaleigu á Airbus A321LR þotu til afhendingar á fyrsta ársfjórðungi árið 2026. Þetta er fimmta Airbus þotan sem Icelandair semur um langtímaleigu á við SMBC. Þetta segir í tilkynningu Icelandair til kauphallarinnar.
Eins og áður hefur verið tilkynnt undirritaði Icelandair tvo samninga í júlí 2023, annars vegar við Airbus um allt að 25 Airbus A321XLR þotum, og hins vegar við SMBC um langtímaleigu á fjórum nýjum A321LR þotum, segir enn fremur í tilkynningunni.
„Það er mjög ánægjulegt að tilkynna um langtímaleigu á enn einni þotu frá SMBC, sem við höfum átt í góðu samstarfi við um árabil. Við höfum þegar hafið innleiðingu þessara öflugu flugvéla sem munu taka við af Boeing 757 vélunum. Þær munu skapa spennandi tækifæri og möguleika á nýjum fjarlægari áfangastöðum ásamt því styðja við sjálfbærnivegferð okkar,“ segir Bogi Nils Bogason, forstjóri Icelandair.