Skel kaupir eina stærstu verslunarkeðju Belgíu

Íslenska fjárfestingafélagið Skel og sænska fyrirtækið Axcent Scandinavia AB hafa fest kaup á belgísku verslunarkeðjunni INNO.

Þetta kemur fram í tilkynningu frá Skel. Félag í jafnri eigu Skeljar og Axcent Scandinavia AB sem á og rekur sænska verslunarfélagið Åhléns hefur fest kaup á belgíska verslunarfélaginu INNO sem er ein stærsta verslunarkeðjan í Belgíu með 16 stórverslanir í þjónustukjörnum í stærstu borgum landsins.

INNO býður vinsæl vörumerki í tískufatnaði, snyrtivörum, leikföngum, húsbúnaði, heimilisvörum, húsgögnum og fleiri vöruflokkum. Fyrirtækið rekur einnig netverslun og heildverslun og eru starfsmenn samtals 1360 talsins.

Ráðgjafi við kaupin var Arion banki.

Velti 44 milljörðun króna

Velta INNO á starfsárinu 2023-2024 nam 313,7 milljónum evra og nam EBITDA hagnaðurhlutfallið 3%. INNO er eina verslunarkeðja sinnar tegundar í Belgíu og rekur hún sögu sína aftur til ársins 1897.

Fjárfesting SKEL í verkefninu nemur um 3% af heildareignum SKEL.

Åhléns er sænsk verslunarkeðja sem rekur yfir 48 verslanir og vöruhús um alla Svíþjóð, þar á meðal 18 verslanir í Stokkhólmi. Verslunin býður fjölda vörumerkja í ólíkum vöruflokkum en þekktust er hún fyrir fatnað, húsbúnað og snyrtivörur.

Åhléns er ein þekktasta verslun Svíþjóðar og hefur hún verið starfrækt frá árinu 1899.

Sænski athafnamaðurinn Ayad Al-Saffar, stofnandi Axcent of Scandinavia, keypti Åhléns árið 2022 ásamt fjárfestingafélaginu Härstedt & Jansson Invest AB og hefur hann leitt stefnumótun og vöxt félagsins síðan þá.

• 1 blogg um fréttina

Bloggað um fréttina

• Birgir Örn Guðjónsson: Jón Ásgeir