22. september 2015 kl. 13:50
Fyrir rúmu ári skrifaði undirritaður pistil um stöðu Íslands undir fyrrisögninni Ísland best í heimi. Það var síðan endurtekið í upphafi árs og höfðu margir gaman af. Þetta er saga sem aðrir segja því umsagnirnar eru fengnar að láni héðan og þaðan.![fotbbestjpg fotbbestjpg](https://www.blog.is/tn/300/users/d8/sigurdurmar/img/fotbbestjpg.jpg?img_id=1270010)
Hér verður gerð tilraun til að uppfæra upptalninguna og rakin þau tilvik sem hafa annað hvort bæst í flóruna eða önnur þau sem hafa endurnýjast á einhvern hátt. Þetta er sem fyrr sett fram til fróðleiks og gamans og ekki tæmandi á nokkurn hátt. Reynt er þó að geta sem flestra. Úttektin gefur að mestu röðun Íslands eins og hún er í dag og er hér stuðst við upplýsingar sem hafa birst í íslenskum fjölmiðlum undanfarin misseri:
- Líklega gleður það marga að Ísland er nú í 23. sæti á styrkleikalista FIFA í knattspyrnu karla. Liðið færir sig upp um eitt sæti á septemberlistanum og jafnar árangurinn frá í júlí og er það hæsta staða sem liðið hefur náð á listanum. Til upplýsinga má nefna að Frakkland er í sætinu fyrir neðan Ísland. Listinn nær til 4 ára í senn og er reiknaður þannig að meðalfjöldi FIFA-stiga úr leikjum síðustu 12 mánaða er lagður saman við meðalfjölda FIFA-stiga úr leikjum eldri er 12 mánaða.
- Ísland er númer sjö á lista yfir þau lönd þar sem er best að vera aldraður samkvæmt alþjóðlegri skýrslu. Best ku vera að verða gamall í Sviss, á hæla þess kemur Noregur og Svíþjóð. Verst er að vera aldraður í Afganistan. Sé eingöngu litið til Evrópulanda er Grikkland í neðsta sæti.Það eru samtökin HelpAge International sem birta þessar niðurstöður í 28 síðna skýrslu. Samtökin berjast fyrir bættum aðbúnaði aldraðra á heimsvísu.Í rannsókninni voru borin saman efnahagsleg og félagsleg lífsskilyrði aldraðra í 96 löndum. Meðal þess sem skoðað var voru gæði ellilífeyriskerfa viðkomandi landa, sjúkrastofnana og aðgengi að almenningssamgöngum. RÚV greindi frá þessu.
- Í ágúst síðastliðnum upplýstist að Reykjavík er í tíunda sæti yfir vingjarnlegustu borgir í heimi í vali hins fræga ferðatímarits Condé Nast. Þar segir að borgin beri þess fagurt vitni hvernig Íslendingum hafi tekist að búa um sig í heldur fjandsamlegu loftslagi með „djúpri tilfinningu fyrir menningu, gáfum, fágun og vingjarnlegheitum“. Þetta eru stór orð, en þarna segir líka að gestrisnin sé stórkostleg hvert sem farið er. Reykjavík sé líka „hip“ og íbúarnir hafi gaman af því að skemmta sér.Aðrar borgir sem komast á þennan lista eru Auckland, Búdapest, Kyoto, Edinborg, Brügge, Kraká, Queenstown, Dublin og Sidney. Hún er talin vingjarnlegust. En þarna eru líka valdar óvingjarnlegustu borgirnar. Á þeim lista eru Cannes, Jakarta, Moskva, Kairó, Nýja-Delhi, Nairobi, Guatemalaborg, Guangzhou, Casablanca og svo er það Caracas í Venesúela sem er valin óvingjarnlegasta borgin. Segir að hún hafi einu sinni verið skemmtileg og heimsborgaraleg, en nú einkennist lífið þar af glæpum, skorti og lélegum lífsgæðum. Þar sé engum tekið með opnum örmum.
- Í júní upplýsti Hagstofan að meðalævi karla á Íslandi var í fyrra 80,6 ár og kvenna 83,6 og lífslíkur Íslendinga eru með þeim mestu í Evrópu. Meðalævi karla á Íslandi hefur lengst um rúmlega sex ár á síðustu þremur áratugum og kvenna um fjögur ár. Karlar í Sviss og á Íslandi hafa síðasta áratuginn getað vænst þess að verða evrópskra karla elstir en meðalævilengdin á þeim tíma var 79,1 ár. Í Evrópu er meðalævi karla styst í Eystrasaltslöndunum. Í Litháen var hún 66,1 ár.
- Í júní upplýstist einnig að Ísland situr í efsta sæti á lista Efnahags- og friðarstofnunarinnar (e. Institute for Ecomomics and Peace) yfir friðsælustu ríki heims, fimmta árið í röð. Í frétt Global finance um úttekt stofnunnarinnar kemur fram að þrátt fyrir að öldin sé sú friðsælasta í sögu mannkyns hafi friðsæld heimsins hrakað á síðustu sjö árum. Stofnuninn gefur árlega út listann „The Global Peace Index“. Samkvæmt honum búa þegnar 111 landa við minni frið en árið 2008 og aðeins ríkir meiri friður en áður í 51 landi. Í frétt Morgunblaðsins segir að Ísland sé með 1,189 stig á lista stofnunarinnar en þar gildir: því lægri tala því betra. Danmörk er í öðru sæti með 1,193 stig og Austurríki vermir þriðja sætið með 1,2 stig. Noregur og Finnland eru einnig meðal tíu friðsælustu landa heims samkvæmt listanum en þar vermir Finnland sjötta sætið og Noregur það tíunda. Svíþjóð er þannig eina Norðurlandið sem ekki kemst á blað en landið deilir 11. sætinu með Tékklandi.
- Ísland er í 20. sæti mannauðsvísis Alþjóðaefnahagsráðsins (World Economic Forum) að því er upplýst var í á mbl.is maí. Með honum er meðal annars lagt mat á hvernig lönd þróa og nýta mannauð sinn og hvaða menntun, hæfni og störf standa fólki til boða. Ísland er neðst Norðurlandanna á listanum en Finnar tróna á toppi hans. Mannauður en ekki fjármagn verða lykilþættir í nýsköpun, samkeppnishæfni og hagvexti á 21. öldinni, að því er kemur fram í formála Klaus Schwab, formanns Alþjóðaefnahagsráðsins. Í skýrslu ráðsins er tekið saman hvernig lönd þróa og nýta mannauð sinn og hvaða menntun, hæfni og störf standa fólki til boða í nokkrum aldurshópum. Skýrslan nær til 124 landa þar sem 92% mannkyns búa.
- Ísland er í þriðja sæti af þeim löndum þar sem best er að vera móðir í heiminum samkvæmt skýrslu Barnaheilla – Save the Children á Íslandi sem opinberuð var í maí. Noregur er í fyrsta sæti en Norðurlöndin skipa fimm efstu sæti listans. Sómalía rekur lestina annað árið í röð – og er það land þar sem verst þykir fyrir mæður að ala börn sín. Af botnsætunum 11 eru níu skipuð Afríkulöndum. Skýrslan um stöðu mæðra kom nú út í 16. sinn en í ár var staða mæðra og barna í borgarsamfélögum til sérstakrar skoðunar.
- Og það eru ekki bara afrek knattspyrnulandsliða okkar sem gleðja okkur. Íslenskar konur og karlar voru þau hröðustu að meðaltali í 72 maraþonhlaupum í tólf borgum á tímabilinu 2009 til 2014, sýndu mestar framfarir og þá hlupu íslenskir maraþonhlauparar að meðaltali hraðast á síðasta ári. Þetta kemur fram í nýrri rannsókn á maraþonhlaupum. Litið er til maraþonhlaupa á tímabilinu 2009 til 2014 í Chicago, Marine, Boston, London, París, Berlín, Frankfurt, Aþenu, Amsterdam, Búdapest, Varsjá og Madríd. Markmið könnunarinnar var að kanna hvernig áhugahlauparar standa sig og því voru niðurstöður afrekshlaupara ekki teknar með. Þrátt fyrir að Íslendingar hafi að meðaltali átt besta tímann í heiminum í maraþoni í fyrra og íslensku konurnar og karlarnir hafi hlaupið hraðar en hinar þjóðirnar hafa íslenskir hlauparar ekki ratað á verðlaunapalla í maraþonhlaupunum. Í könnuninni er litið til meðaltals og því gefur hún þessar niðurstöður.
- Íslenska þjóðin hoppar úr níunda og upp í annað sætið yfir hamingjusömustu þjóðir heim í árlegri samantekt Sustainable Development Solutions Network fyrir Sameinuðu þjóðirnar. Sviss trónir á toppi listans en eins og áður segir er Ísland í öðru sæti. Danmörk og Noregur fylgja í humátt á eftir, þá Kanada og Finnland og loks eru það Holland, Svíþjóð, Nýja Sjáland og Ástralía sem skipa sér í neðstu sæti topp tíu listans. Í fimmta neðsta sæti listans er Afganistan, þar á eftir koma Rúanda og Benín. Þriðju minnstu lífshamingjunnar njóta íbúar Sýrlands, þá íbúar Búrúndí og loks eru það íbúar Tógó sem reka lestina. Hamingja þjóða er ákvörðuð útfrá ýmsum þáttum. Meðal annars er hún metin útfrá vergri þjóðarframleiðslu, félagslegum stuðningi, lífslíkum, einstaklingsfrelsi, gjafmildi og upplifun af spillingu.Í skýrslunni má lesa að Íslendingar halda ágætlega í við Svisslendinga og eru í raun aðeins um 26 stigum frá fyrsta sætinu. Íslendingar virðast áberandi gjafmildari en Svisslendingar en hinsvegar virðast fleiri upplifa spillingu hér á landi en í Sviss, hvað sem veldur því.
Það skal tekið fram að þau viðhorf sem birtast í þessum pistli eru eingöngu höfundar og á hans ábyrgð.