James D. Melville, sendiherra Bandaríkjanna í Eistlandi, ætlar að segja af sér vegna óánægju með ummæli Donald Trump, forseta Bandaríkjanna, um bandamenn Bandaríkjanna í Evrópu. Melville greindi frá þessu í færslu á Facebook, en Foreign Policy sagði fyrst frá.
Sagði hann ummæli Trump um NATO og Evrópusambandið hafa orðið til þess að hann tók þessa ákvörðun. En forsetinn lagði nýlega verndartolla á vörur frá Evrópu og hefur verið duglegur að gagnrýna bandamenn Bandaríkjanna í NATO.
Melville sagði í færslu sinni að það forsetinn segði að Evrópusambandið hefði verið sett á fót til að notfæra sér Bandaríkin eða ráðast að sparibauk landsins, og að NATO væri jafnslæmt og NAFTA, væri ekki bara rangt, heldur sannaði það að það væri kominn tími á hann að segja af sér.
Melville er ekki eini bandaríski erindrekinn sem sagt hefur af sér vegna stefnu eða ummæla Trump, en sendiherrann í Panama sagði af sér snemma á árinu og sagðist ekki geta starfað undir forsetanum. Skömmu áður hafði starfsmaður bandarísku utanríkisþjónustunnar í Naíróbí hætt vegna þess að hann taldi að Bandaríkin hefðu væru hætt að forgangsraða í þágu mannréttinda.