„Þetta er alveg skelfilegt. Við erum alveg háð rafmagni. Við missum vatn og allt saman, við getum ekki einu sinni sturtað niður,“ segir Elvar Eyberg Halldórsson, íbúi í Höfnum á Reykjanesi, en rafmagnslaust hefur verið á öllum Suðurnesjum síðan upp úr klukkan þrjú síðdegis.
„Er ekki 10 stiga frost? Ég er í timburhúsi og það á eftir að kólna hratt hjá mér. Svo er leikur í gangi en ég bjarga mér með nettengdum síma sem ég tengi við spjaldtölvu.“
Elvar segist ekki vera óvanur rafmagnsleysinu en hann segir rafmagnsleysi mjög algengt í Höfnum.
„Þetta kemur illa við okkur. Við erum ekki í alfaraleið, við erum 9 km frá Fitjum.“