Ásdís Hjálmsdóttir Annerud hafnaði í þriðja sæti á frjálsíþróttamóti í Finnlandi um helgina, Kuortane Games.
Ásdís kastaði lengst 58,68 metra í þremur köstum en hún hefur verið að kasta yfir 60 metra undanfarið í sumar. Nikola Ogrodnikova frá Tékklandi varð í öðru sæti, kastaði 60,61 metra, og Lina Muze frá Lettlandi í fyrsta sæti, kastaði 62,75 metra.
Lengsta kast Ásdísar í sumar kom á Bottnarydskastet-mótinu í Svíþjóð í júní þar sem hún kastaði lengst 62,66 metra. Íslandsmet hennar í greininni er 63,43 metrar en það setti hún árið 2017.