„Þetta er allt að koma núna“

„Það má segja að þetta sé annar kolmunnaveiðitúr ársins hjá okkur og sá fyrsti í færeyskan sjó. Þetta er allt að koma núna og mikið af ágætum kolmunna er að ganga norður í færeysku lögsöguna.“

Þetta er haft eftir Róberti Axelssyni, skipstjóra Venusar NS, á vef HB Granda.

Venus kom til heimahafnar á Vopnafirði í gær með um 2.500 tonn af kolmunna, en aflinn fékkst í nokkrum holum í færeyskri lögsögu. Kolmunninn er sagður hafa gengið af krafti norður með Skotlandi og inn í færeysku lögsöguna á undanförnum dögum.

Róbert segir áhöfnina á Venusi hafa farið allt suður að Rockall í fyrstu veiðiferðinni. Þá hafi aflinn verið að detta niður og því hafi áhöfnin reynt fyrir sér á alþjóðlegu hafsvæði norðan við Rockall.

Leituðu vars á Suðurey

Aflabrögðin hafi hins vegar verið treg og bestu aflabrögðin hafi verið inni í ESB-lögsögunni, reyndar það góð að ESB-skipin séu búin með kvóta sína og Norðmenn séu í svipaðri stöðu eftir að hafa veitt meira en 200 þúsund tonn.

Venus, ásamt Víkingi AK, leitaði vars í höfn á Suðurey í síðustu viku vegna veðurs. Fór skipið út að nýju á skírdag og veiðin verið góð síðan.

Róbert býst við að komast aftur til veiða í kvöld að lokinni löndun. Þá mun afli Víkings bíða löndunarmanna en Víkingur kom til hafnar á Vopnafirði seint í gærkvöldi, að því er fram kemur á vef HB Granda.

• Blogga um frétt