Skrúfurnar þær stærstu miðað við vélarafl

Skrokklag ísfisktogaranna Breka VE og Páls Pálssonar ÍS er nýlunda meðal skipa af svipaðri stærð og skrúfurnar eru þær stærstu í víðri veröld miðað við vélarafl. Breki VE er í smíðum í Kína þar sem verið er að leggja lokahönd á hann. Þetta kemur fram á vef Vinnslustöðvarinnar í Vestmannaeyjum. 

Skrúfur Breka og Páls eru tæplega fimm metrar í þvermál og nýta vélarafl við togveiðar á þann veg að áætlað er að eldsneytissparnaður nemi allt að 40%. 

„Markmiðið var að stytta togtímann eins og kostur væri. Það gerðist fyrst og fremst með því að hanna og búa Breka og Pál tveimur trollum sem hægt er að draga samtímis. Togari með tvö troll í sjónum samtímis hefur 60% meiri veiðigetu en togari með eitt troll.“ Þetta er haft eftir Guðna Ingvari Guðnasyni, umsjónarmanni viðhalds fasteigna og skipa Vinnslustöðvarinnar.  

Hannaðir í þágu umhverfisverndar

„Við getum fyllilega staðið við þá fullyrðingu að engir togarar af þessari stærð í heiminum nýta vélarafl betur til togveiða en gerist með Breka og Pál Pálsson. Þeir eru sannarlega hannaðir í þágu gæða, orkusparnaðar og umhverfisverndar." Þetta er haft eftir Sævari  Birgissyni, framkvæmdastjóri Skipasýnar sem hannaði skipin. 

• Blogga um frétt