Verði fiskiskipum frá ríkjum Evrópusambandsins ekki leyft að veiða með sama hætti og áður í efnahagslögsögu Bretlands eftir útgöngu Breta úr sambandinu sem fyrirhuguð er í lok þessa mánaðar gæti það leitt til átaka í anda þorskastríða Íslendinga og Breta.

Þetta eru skilaboð Evrópusambandsins til breskra stjórnvalda en ráðamenn í Brussel hafa sett áframhaldandi aðgang sjómanna ríkja sambandsins að breskum fiskimiðum sem skilyrði fyrir fyrirhuguðum fríverslunarsamningi við Breta. Boris Johnson, forsætisráðherra Bretlands, hefur hins vegar ítrekað varað Evrópusambandið við því að eftir útgönguna úr sambandinu muni Bretar taka að fullu í eigin hendur stjórn breskra fiskimiða.

Frétt af mbl.is

ESB vill veiða áfram við Bretland

„Við viljum forðast öll fiskveiðiátök í Atlantshafinu. Við höfum orðið vitni að þeim áður og viljum ekki sjá slíkt aftur,“ sagði Andrej Plenkovic, forsætisráðherra Króatíu, en Króatar fara með forsætið innan ráðherraráðs Evrópusambandsins næstu sex mánuðina.

Fjallað er um málið á fréttavef breska dagblaðsins Daily Telegraph og þorskastríðin á milli Íslendinga og Breta rifjuð upp þar sem íslensk varðskip hafi neytt breska sjómenn til þess að yfirgefa fiskimiðin í kringum Ísland á áttunda áratug síðustu aldar.

Plenkovic sagði áframhaldandi aðgang að breskum fiskimiðum vera mjög mikilvægan fyrir umtalsverðan fjölda ríkja Evrópusambandsins eins og Frakkland og að ríki sambandsins myndu beita sér í sameiningu fyrir því að fá Breta til þess að gefa eftir í þeim efnum.

Gert er ráð fyrir að Bretar yfirgefi Evrópusambandið formlega 31. janúar en neðri deild breska þingsins samþykkti fyrr í vikunni útgöngusamning ríkisstjórnar Johnsons við sambandið. Gert er ráð fyrir að lávarðadeild þingsins taki samninginn fyrir í næstu viku.

Tengdar fréttir

Brexit

Nigel Farage gefur kost á sér og leiðir flokk

• Verði auðveldara að fara til og frá Bretlandi
• Fríverslunarsamningurinn formlega genginn í gildi
• Harma hve illa Bretum hefur tekist að semja
• Fimm mál sem leiddu til fallsins

» Fleiri tengdar fréttir

• 2 blogg um fréttina

Bloggað um fréttina

• Ómar Ragnarsson: Hlutverkaskiptin í landhelgismálunum.
• Jóhann Elíasson: ESB ÆTLAR ALDREI AÐ HLEYPA BRETUM ÚT - ÞAÐ STÓÐ …