15 íslensk menningarverkefni fengu styrk úr Norræna menningarsjóðnum árið 2011, samkvæmt tilkynningu.
Á síðasta ári greiddi Norræni menningarsjóðurinn út 23,4 milljónir danskra króna til 232 norrænna samstarfsverkefna. 15 af þessum verkefnum eru íslensk og fengu þau verkefni samanlagt 1,393 milljónir danskra króna í styrk. Það svarar til tæplega 30 milljóna íslenskra króna.
Fulltrúar Íslands í stjórn sjóðsins eru Aðalsteinn Ásberg Sigurðsson rithöfundur og Siv Friðleifsdóttir alþingismaður.
„Íslendingar hafa sýnt Norræna menningarsjóðnum mikinn áhuga. Í fyrra úthlutaði sjóðurinn tæplega 1,4 milljónum danskra króna til menningarverkefna sem Íslendingar stýra. Á síðustu árum hafa umsóknir frá Íslandi aukist og það er mjög gleðilegt,“ segir Siv Friðleifsdóttir í tilkynningu.
Árið 2012 mun Norræni menningarsjóðurinn útdeila um 26,5 milljónum danskra króna til samnorrænna menningarverkefna.