Leikarinn Shia LaBeouf þurfti að dúsa í fangelsi í 24 klukkustundir eftir að hafa verið handtekinn fyrir óspektir á almannafæri í júní á þessi ári. LaBeouf segir dvölina í fangelsinu hafa verið erfiða en hann þurfti að klæðast einskonar spennitreyju og grímu sem minnti á grímuna sem mannætan Hannibal var með í samnefndri kvikmynd.
„Fangelsið var frekar ógnvekjandi, ég var þarna í 24 eða 25 klukkustundir en mér fannst þetta vera heil eilífð. Ég var færður í sérstakan jakka og svo settu þeir Hannibal-grímu á mig. Það var hræðilegt,“ útskýrði leikarinn ungi í spjallþætti Ellen DeGeneres.
Eins og áður sagði var LaBeouf færður í fangageymslu eftir að hafa látið öllum illum látum á götum New York borgar í sumar. Meðal þess sem hann gerði var að hrækja á lögreglumann. LaBeouf viðurkennir að hann hafi gengið of langt. „Ég hrækti á löggu. Gaur, ef þú ert að horfa þá ég biðst afsökunar, afsakið. Þetta var brjálað.“