Fúsi, nýjasta kvikmynd Dags Kára var heimsfrumsýnd á alþjóðlegu kvikmyndaháttíðinni í Berlín gær. Fram kemur í tilkynningu, að hún hafi fengið góðar viðtökur hátíðargesta auk þess sem hún hafi fengið jákvæða dóma gagnrýnenda, þar á meðal hjá Screen International og The Hollywood Reporter ásamt nokkrum þýskum fjölmiðlum.
Fúsi segir frá titilpersónunni Fúsa, sem er liðlega fertugur og býr einn með móður sinni. Líf hans er í afar föstum skorðum og lítið sem kemur á óvart. Hann minnir á unga sem hefur komið sér þægilega fyrir í hreiðrinu og hefur enn ekki haft kjark til að hefja sig til flugs. Þegar ung stúlka og kona á hans reki koma óvænt inn í líf hans, fer allt úr skorðum og hann þarf að takast á við ýmislegt í fyrsta sinn.
Fúsi, sem ber heitið Virgin Mountain á ensku,er sýnd sem hluti af Berlinale Special Gala, sem samanstendur af myndum sem eru sérstaklega valdar af Dieter Kosslick hátíðarstjóra. Kosslick kynnti myndina sérstaklega fyrir heimsfrumsýninguna og heilsaði upp á Dag Kára og íslensku sendinefndina.
Fúsi hefur nú þegar verið seld til eftirtalinna landa: Þýskalands, Frakklands, Belgíu, Hollands, Lúxemborg og Brasilíu. Væntir franska dreifingarfyrirtækið BAC að fleiri tilboð muni berast í kjölfar frumsýningarinnar.
Fúsi verður frumsýnd hér á landi þann 20. mars næstkomandi í Smárabíói, Háskólabíói og Laugarásbíói.
Hér má lesa viðtal sem kvikmyndatímaritið Variety tók við Dag Kára í aðdraganda frumsýningarinnar.